{"kind":"section","lang":"grc","language":"Ancient Greek","title":"Acta Thomae 41","citation":"Acta Thomae, Acta Thomae 41","ref":"41","level":null,"urn":"urn:cts:greekLit:tlg2038.tlg001:41","url":"https://interlinea.aeterna-institute.org/library/greek/acta-thomae/text/41","api":"https://interlinea.aeterna-institute.org/api/v1/library/greek/acta-thomae/text/41","markdown":"https://interlinea.aeterna-institute.org/library/greek/acta-thomae/text/41.md","author":{"name":"Acta Thomae","url":"https://interlinea.aeterna-institute.org/library/greek/acta-thomae"},"work":{"title":"Acta Thomae","url":"https://interlinea.aeterna-institute.org/library/greek/acta-thomae/text","urn":"urn:cts:greekLit:tlg2038.tlg001"},"verse":false,"words":106,"text":"Ὅτε δὲ ἦλθεν ἐγγὺς τῶν πυλῶν τῆς πόλεως, κατῆλθεν ἀπ᾽ αὐτοῦ λέγων· Ἄπελθε καὶ διαφυλάχθητι ὅπου ἦς. Εὐθέως δὲ ὁ πῶλος πεσὼν εἰς τὸ ἔδαφος παρὰ τοὺς πόδας τοῦ ἀποστόλου ἀπέθανεν. πάντες δὲ οἱ παρόντες ἠθύμησαν λέγοντες τῷ ἀποστόλῳ· Ζωοποίησον αὐτὸν καὶ ἀνέγειρον. Ὃ δὲ ἀποκριθεὶς εἶπεν αὐτοῖς· Ἐγὼ μὲν ἠδυνάμην ἐγεῖραι αὐτὸν διὰ τοῦ ὀνόματος Ἰησοῦ Χριστοῦ· ἀλλὰ πάντως τοῦτο συμφέρει· ὁ γὰρ αὐτῷ δοὺς λόγον ἵνα λαλήσῃ ἠδύνατο αὐτὸν ποιῆσαι μηδὲ ἀποθανεῖν· οὐκ ἐγείρω δὲ αὐτὸν οὐχ ὡς μὴ δυνάμενος, ἀλλ᾽ ὅτι τοῦτό ἐστιν τὸ συμβαλλόμενον αὐτῷ καὶ συμφέρον. Τοῖς δὲ παροῦσιν παρεκελεύσατο ὀρύξαι σκάμμα καὶ θάψαι αὐτοῦ τὸ σῶμα· καὶ ἐποίησαν ὡς ἐκέλευσεν.","prev":{"citation":"Acta Thomae 40","label":"Section 40","url":"https://interlinea.aeterna-institute.org/library/greek/acta-thomae/text/40","api":"https://interlinea.aeterna-institute.org/api/v1/library/greek/acta-thomae/text/40"},"next":{"citation":"Acta Thomae Πρᾶξις ε´ περὶ τοῦ δαίμονος τοῦ ἐνοικήσαντος εἰς τὴν γυναῖκα.","label":"Πρᾶξις ε´ περὶ τοῦ δαίμονος τοῦ ἐνοικήσαντος εἰς τὴν γυναῖκα.","url":"https://interlinea.aeterna-institute.org/library/greek/acta-thomae/text/%CE%A0%CF%81%E1%BE%B6%CE%BE%CE%B9%CF%82%20%CE%B5%C2%B4%20%CF%80%CE%B5%CF%81%E1%BD%B6%20%CF%84%CE%BF%E1%BF%A6%20%CE%B4%CE%B1%CE%AF%CE%BC%CE%BF%CE%BD%CE%BF%CF%82%20%CF%84%CE%BF%E1%BF%A6%20%E1%BC%90%CE%BD%CE%BF%CE%B9%CE%BA%CE%AE%CF%83%CE%B1%CE%BD%CF%84%CE%BF%CF%82%20%CE%B5%E1%BC%B0%CF%82%20%CF%84%E1%BD%B4%CE%BD%20%CE%B3%CF%85%CE%BD%CE%B1%E1%BF%96%CE%BA%CE%B1.","api":"https://interlinea.aeterna-institute.org/api/v1/library/greek/acta-thomae/text/%CE%A0%CF%81%E1%BE%B6%CE%BE%CE%B9%CF%82%20%CE%B5%C2%B4%20%CF%80%CE%B5%CF%81%E1%BD%B6%20%CF%84%CE%BF%E1%BF%A6%20%CE%B4%CE%B1%CE%AF%CE%BC%CE%BF%CE%BD%CE%BF%CF%82%20%CF%84%CE%BF%E1%BF%A6%20%E1%BC%90%CE%BD%CE%BF%CE%B9%CE%BA%CE%AE%CF%83%CE%B1%CE%BD%CF%84%CE%BF%CF%82%20%CE%B5%E1%BC%B0%CF%82%20%CF%84%E1%BD%B4%CE%BD%20%CE%B3%CF%85%CE%BD%CE%B1%E1%BF%96%CE%BA%CE%B1."},"credit":{"text":"Acta Thomae, Πράξεις τοῦ ἁγίου ἀποστόλου Θωμᾶ, ed. Maximilian Bonnet. Text: Open Greek and Latin (First1KGreek), via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg2038.tlg001.local001/","quality":"proofread"}}