{"kind":"section","lang":"grc","language":"Ancient Greek","title":"In Ctesiphontem 175","citation":"Aeschines, In Ctesiphontem 175","ref":"175","level":null,"urn":"urn:cts:greekLit:tlg0026.tlg003:175","url":"https://interlinea.aeterna-institute.org/library/greek/aeschines/text-3/175","api":"https://interlinea.aeterna-institute.org/api/v1/library/greek/aeschines/text-3/175","markdown":"https://interlinea.aeterna-institute.org/library/greek/aeschines/text-3/175.md","author":{"name":"Aeschines","url":"https://interlinea.aeterna-institute.org/library/greek/aeschines"},"work":{"title":"In Ctesiphontem","url":"https://interlinea.aeterna-institute.org/library/greek/aeschines/text-3","urn":"urn:cts:greekLit:tlg0026.tlg003"},"verse":false,"words":102,"text":"πρὸς δὲ ἀνδρείαν βραχύς μοι λείπεται λόγος. εἰ μὲν γὰρ ἠρνεῖτο μὴ δειλὸς εἶναι, ἢ ὑμεῖς μὴ συνῄδετε, διατριβὴν ὁ λόγος ἄν μοι παρεῖχεν· ἐπειδὴ δὲ καὶ αὐτὸς ὁμολογεῖ ἐν ταῖς ἐκκλησίαις, καὶ ὑμεῖς σύνιστε, λοιπὸν ὑπομνῆσαι τοὺς περὶ τούτων κειμένους νόμους. ὁ γὰρ Σόλων ὁ παλαιὸς νομοθέτης ἐν τοῖς αὐτοῖς ἐπιτιμίοις ᾤετο δεῖν ἐνέχεσθαι τὸν ἀστράτευτον καὶ τὸν λελοιπότα τὴν τάξιν καὶ τὸν δειλὸν ὁμοίως· εἰσὶ γὰρ καὶ δειλίας γραφαί. καίτοι θαυμάσειεν ἄν τις ὑμῶν, εἰ εἰσὶ φύσεως γραφαί. εἰσίν. τίνος ἕνεκα; ἵνʼ ἕκαστος ἡμῶν τὰς ἐκ τῶν νόμων ζημίας φοβούμενος μᾶλλον ἢ τοὺς πολεμίους, ἀμείνων ἀγωνιστὴς ὑπὲρ τῆς πατρίδος ὑπάρχῃ·","prev":{"citation":"In Ctesiphontem 174","label":"Section 174","url":"https://interlinea.aeterna-institute.org/library/greek/aeschines/text-3/174","api":"https://interlinea.aeterna-institute.org/api/v1/library/greek/aeschines/text-3/174"},"next":{"citation":"In Ctesiphontem 176","label":"Section 176","url":"https://interlinea.aeterna-institute.org/library/greek/aeschines/text-3/176","api":"https://interlinea.aeterna-institute.org/api/v1/library/greek/aeschines/text-3/176"},"credit":{"text":"Aeschines, Κατά Κτησιφώντος, ed. Charles Darwin Adams. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0026.tlg003.local001/","quality":"proofread"}}