{"kind":"section","lang":"grc","language":"Ancient Greek","title":"De falsa legatione 79","citation":"Aeschines, De falsa legatione 79","ref":"79","level":null,"urn":"urn:cts:greekLit:tlg0026.tlg002:79","url":"https://interlinea.aeterna-institute.org/library/greek/aeschines/text/79","api":"https://interlinea.aeterna-institute.org/api/v1/library/greek/aeschines/text/79","markdown":"https://interlinea.aeterna-institute.org/library/greek/aeschines/text/79.md","author":{"name":"Aeschines","url":"https://interlinea.aeterna-institute.org/library/greek/aeschines"},"work":{"title":"De falsa legatione","url":"https://interlinea.aeterna-institute.org/library/greek/aeschines/text","urn":"urn:cts:greekLit:tlg0026.tlg002"},"verse":false,"words":103,"text":"ἐπιτιμᾷς δέ μοι καὶ τὴν ἐν τοῖς μυρίοις ἐν Ἀρκαδίᾳ δημηγορίαν καὶ πρεσβείαν, καὶ μεταβεβλῆσθαί με φῄς, αὐτὸς ὢν ἀνδραποδώδης καὶ μόνον οὐκ ἐστιγμένος αὐτόμολος. ἐγὼ δʼ ἐν μὲν τῷ πολέμῳ συνίστην, καθʼ ὅσον ἦν δυνατός, Ἀρκάδας καὶ τοὺς ἄλλους Ἕλληνας ἐπὶ Φίλιππον· οὐδενὸς δʼ ἀνθρώπων ἐπικουροῦντος τῇ πόλει, ἀλλὰ τῶν μὲν περιορώντων ὅ τι συμβήσεται, τῶν δὲ συνεπιστρατευόντων, τῶν δʼ ἐν τῇ πόλει ῥητόρων χορηγὸν ταῖς καθʼ ἡμέραν δαπάναις τὸν πόλεμον ποιουμένων, ὁμολογῶ συμβουλεῦσαι τῷ δήμῳ διαλύσασθαι πρὸς Φίλιππον καὶ τὴν εἰρήνην συνθέσθαι, ἣν σὺ νομίζεις νῦν αἰσχράν, ὁ οὐδὲ πώποθʼ ἁψάμενος ὅπλων, ἐγὼ δὲ ταύτην εἶναι πολλῷ φημι καλλίω τοῦ πολέμου.","prev":{"citation":"De falsa legatione 78","label":"Section 78","url":"https://interlinea.aeterna-institute.org/library/greek/aeschines/text/78","api":"https://interlinea.aeterna-institute.org/api/v1/library/greek/aeschines/text/78"},"next":{"citation":"De falsa legatione 80","label":"Section 80","url":"https://interlinea.aeterna-institute.org/library/greek/aeschines/text/80","api":"https://interlinea.aeterna-institute.org/api/v1/library/greek/aeschines/text/80"},"credit":{"text":"Aeschines, Περὶ τῆς παραπρεσβείας, ed. Charles Darwin Adams. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0026.tlg002.local001/","quality":"proofread"}}