{"kind":"section","lang":"grc","language":"Ancient Greek","title":"De falsa legatione 82","citation":"Aeschines, De falsa legatione 82","ref":"82","level":null,"urn":"urn:cts:greekLit:tlg0026.tlg002:82","url":"https://interlinea.aeterna-institute.org/library/greek/aeschines/text/82","api":"https://interlinea.aeterna-institute.org/api/v1/library/greek/aeschines/text/82","markdown":"https://interlinea.aeterna-institute.org/library/greek/aeschines/text/82.md","author":{"name":"Aeschines","url":"https://interlinea.aeterna-institute.org/library/greek/aeschines"},"work":{"title":"De falsa legatione","url":"https://interlinea.aeterna-institute.org/library/greek/aeschines/text","urn":"urn:cts:greekLit:tlg0026.tlg002"},"verse":false,"words":76,"text":"συνέβαινε δέ, ὅτε τὴν προτέραν ἐπρεσβεύομεν πρεσβείαν, ἐμοὶ μὲν μετὰ τῶν συμπρέσβεων ἀπιέναι δεῦρο, Φιλίππῳ δʼ ἐπὶ Θράκην ἐξιέναι, πρὸς δʼ ἡμᾶς ὡμολογηκέναι, ἕως ἂν ὑμεῖς περὶ τῆς εἰρήνης βουλεύσησθε, μὴ ἐπιβήσεσθαι μεθʼ ὅπλων Χερρονήσου. ἐν ἐκείνῃ μὲν οὖν τῇ ἡμέρᾳ ᾗ ὑμεῖς ἐψηφίσασθε τὴν εἰρήνην, οὐδεμία μνεία ἐγένετο περὶ Κερσοβλέπτου· ἤδη δὲ ἡμῶν κεχειροτονημένων ἐπὶ τοὺς ὅρκους, οὔπω δὲ ἀπηρκότων ἐπὶ τὴν ὑστέραν πρεσβείαν, ἐκκλησία γίγνεται, ἐν ᾗ Δημοσθένης ὁ νυνὶ κατηγορῶν ἐμοῦ λαγχάνει προεδρεύειν.","prev":{"citation":"De falsa legatione 81","label":"Section 81","url":"https://interlinea.aeterna-institute.org/library/greek/aeschines/text/81","api":"https://interlinea.aeterna-institute.org/api/v1/library/greek/aeschines/text/81"},"next":{"citation":"De falsa legatione 83","label":"Section 83","url":"https://interlinea.aeterna-institute.org/library/greek/aeschines/text/83","api":"https://interlinea.aeterna-institute.org/api/v1/library/greek/aeschines/text/83"},"credit":{"text":"Aeschines, Περὶ τῆς παραπρεσβείας, ed. Charles Darwin Adams. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0026.tlg002.local001/","quality":"proofread"}}