{"kind":"section","lang":"grc","language":"Ancient Greek","title":"Epitome doctrinae Platonicae 22","citation":"Albinus, Epitome doctrinae Platonicae 22","ref":"22","level":null,"urn":"urn:cts:greekLit:tlg0693.tlg001:22","url":"https://interlinea.aeterna-institute.org/library/greek/albinus/text/22","api":"https://interlinea.aeterna-institute.org/api/v1/library/greek/albinus/text/22","markdown":"https://interlinea.aeterna-institute.org/library/greek/albinus/text/22.md","author":{"name":"Albinus","url":"https://interlinea.aeterna-institute.org/library/greek/albinus"},"work":{"title":"Epitome doctrinae Platonicae","url":"https://interlinea.aeterna-institute.org/library/greek/albinus/text","urn":"urn:cts:greekLit:tlg0693.tlg001"},"verse":false,"words":145,"text":"Νόσων δὲ αἰτίας εἶναι πολλάς· πρῶτον μὲν τὴν τῶν στοιχείων ἔνδειαν καὶ ὑπερβολὴν μετάστασίν τε εἰς ἄλλους οὐκ οἰκείους τόπους· δεύτερον δὲ τὴν τῶν ὁμογενῶν ἀνάπαλιν γένεσιν, οἷον ἐκ σαρκὸς εἰ γένοιτο αἷμα ἢ χολὴ ἢ φλέγμα· πάντα γὰρ ταῦτα οὐδὲν ἄλλο ἢ σύντηξιν εἶναι. τὸ γὰρ φλέγμα ὑπάρχειν νέας σαρκὸς σύντηξιν· ἱδρῶτα δὲ καὶ τὸ δάκρυον ὥσπερ ὀρόν τινα φλέγματος· τὸ δὲ φλέγμα ἔξω μὲν ἀπολειφθὲν λεύκας καὶ ἀλφοὺς ἀπογεννᾷ, εἴσω δὲ κερασθὲν χολῇ μελαίνῃ τὴν καλουμένην ἱερὰν νόσον ἐπάγει, τὸ δὲ ὀξὺ καὶ ἁλμυρὸν φλέγμα τῶν ἐν ῥύσει παθῶν αἴτιον· πάντα δὲ τὰ φλεγμαίνοντα ὑπὸ χολῆς τοῦτο πέπονθε· τὰ γὰρ μυρία πάθη καὶ πολύτροπα χολή τε καὶ φλέγμα ἀπεργάζεται. τὸν μὲν δὴ συνεχῆ πυρετὸν γίνεσθαι τοῦ πυρὸς πλεονάσαντος, τὸν δὲ ἀμφημερινὸν τοῦ ἀέρος, τριταῖον δὲ ὕδατος, τεταρταῖον δὲ γῆς. ἑξῆς δὲ περὶ ψυχῆς ῥητέον, ἐντεῦθέν ποθεν ἀναλαβόντας τὸν λόγον, εἰ καὶ δόξομεν παλιλογεῖν.","prev":{"citation":"Epitome doctrinae Platonicae 21","label":"Chapter 21","url":"https://interlinea.aeterna-institute.org/library/greek/albinus/text/21","api":"https://interlinea.aeterna-institute.org/api/v1/library/greek/albinus/text/21"},"next":{"citation":"Epitome doctrinae Platonicae 23","label":"Chapter 23","url":"https://interlinea.aeterna-institute.org/library/greek/albinus/text/23","api":"https://interlinea.aeterna-institute.org/api/v1/library/greek/albinus/text/23"},"credit":{"text":"Albinus, Διδασκαλικὸς τῶν Πλάτωνος δογμάτων, ed. Karl Friedrich Hermann. Text: Open Greek and Latin (First1KGreek), via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0693.tlg001.local001/","quality":"proofread"}}