{"kind":"section","lang":"grc","language":"Ancient Greek","title":"De choreuta 28","citation":"Antiphon, De choreuta 28","ref":"28","level":null,"urn":"urn:cts:greekLit:tlg0028.tlg006:28","url":"https://interlinea.aeterna-institute.org/library/greek/antiphon/text-2/28","api":"https://interlinea.aeterna-institute.org/api/v1/library/greek/antiphon/text-2/28","markdown":"https://interlinea.aeterna-institute.org/library/greek/antiphon/text-2/28.md","author":{"name":"Antiphon","url":"https://interlinea.aeterna-institute.org/library/greek/antiphon"},"work":{"title":"De choreuta","url":"https://interlinea.aeterna-institute.org/library/greek/antiphon/text-2","urn":"urn:cts:greekLit:tlg0028.tlg006"},"verse":false,"words":76,"text":"ἐπίσταμαι δὲ καὶ τάδε, ὦ ἄνδρες, ὅτι εἰ μὲν τούτοις ἐμοῦ κατεμαρτύρουν οἱ μάρτυρες οἱ παραγενόμενοι, αὐτοῖς ἂν τούτοις ἰσχυροτάτοις ἐχρῶντο καὶ πίστιν ταύτην σαφεστάτην ἀπέφαινον, τοὺς μάρτυρας τοὺς καταμαρτυροῦντας· τῶν αὐτῶν δὲ τούτων μαρτυρούντων, ἃ μὲν ἐγὼ λέγω, ἀληθῆ εἶναι, ἃ δὲ οὗτοι λέγουσιν, οὐκ ἀληθῆ, τοῖς μὲν μάρτυσι τοῖς ἐμοὶ μαρτυροῦσιν ἀπιστεῖν ὑμᾶς διδάσκουσι, τοῖς δὲ λόγοις οἷς αὐτοὶ λέγουσι πιστεύειν ὑμᾶς φασι χρῆναι, οὓς ἐγὼ εἰ ἔλεγον ἄνευ μαρτύρων, ψευδεῖς ἂν κατηγόρουν εἶναι.","prev":{"citation":"De choreuta 27","label":"Section 27","url":"https://interlinea.aeterna-institute.org/library/greek/antiphon/text-2/27","api":"https://interlinea.aeterna-institute.org/api/v1/library/greek/antiphon/text-2/27"},"next":{"citation":"De choreuta 29","label":"Section 29","url":"https://interlinea.aeterna-institute.org/library/greek/antiphon/text-2/29","api":"https://interlinea.aeterna-institute.org/api/v1/library/greek/antiphon/text-2/29"},"credit":{"text":"Antiphon, Περὶ τοῦ χορευτοῦ, ed. Kenneth John Maidment. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0028.tlg006.local001/","quality":"proofread"}}