{"kind":"section","lang":"grc","language":"Ancient Greek","title":"Tetralogia 1 10-11","citation":"Antiphon, Tetralogia 1 10-11","ref":"10","level":null,"urn":"urn:cts:greekLit:tlg0028.tlg002:10-11","url":"https://interlinea.aeterna-institute.org/library/greek/antiphon/text-4/10","api":"https://interlinea.aeterna-institute.org/api/v1/library/greek/antiphon/text-4/10","markdown":"https://interlinea.aeterna-institute.org/library/greek/antiphon/text-4/10.md","author":{"name":"Antiphon","url":"https://interlinea.aeterna-institute.org/library/greek/antiphon"},"work":{"title":"Tetralogia 1","url":"https://interlinea.aeterna-institute.org/library/greek/antiphon/text-4","urn":"urn:cts:greekLit:tlg0028.tlg002"},"verse":false,"words":112,"text":"οὕτω μὲν ἃ κατηγόρηταί μου, πάντα ἄπιστά ἐστιν· ἀπολύεσθαι δὲ ὑφʼ ὑμῶν, εἰ καὶ εἰκότως μὲν ὄντως δὲ μὴ ἀπέκτεινα τὸν ἄνδρα, πολὺ μᾶλλον δίκαιός εἰμι. ἐγώ τε γὰρ φανερὸν ὅτι μεγάλα ἀδικούμενος ἠμυνόμην· οὐ γὰρ ἂν εἰκότως ἐδόκουν ἀποκτεῖναι αὐτόν· τούς τε ἀποκτείναντας καὶ οὐ τοὺς αἰτίαν ἔχοντας ἀποκτεῖναι ὀρθῶς ἂν καταλαμβάνοιτε. ἐκ δὲ παντὸς τρόπου ἀπολυόμενος τῆς αἰτίας ἔγωγε οὔτε εἰς τὰ τεμένη εἰσιὼν τὴν ἁγνείαν τῶν θεῶν μιανῶ, οὔτε ὑμᾶς πείθων ἀπολῦσαί με ἀνόσια πράσσω. οἱ δὲ διώκοντες μὲν ἐμὲ τὸν ἀναίτιον, τὸν δʼ αἴτιον ἀφιέντες, τῆς τε ἀφορίας αἴτιοι γίγνονται, ὑμᾶς τε ἀσεβεῖς εἰς τοὺς θεοὺς πείθοντες καταστῆναι πάντων ὧν ἐμὲ ἄξιόν φασι παθεῖν εἶναι δίκαιοί εἰσι τυγχάνειν.","prev":{"citation":"Tetralogia 1 9","label":"Ἀπολογία εἰς τὸ αὐτὸ πράγμα","url":"https://interlinea.aeterna-institute.org/library/greek/antiphon/text-4/9","api":"https://interlinea.aeterna-institute.org/api/v1/library/greek/antiphon/text-4/9"},"next":{"citation":"Tetralogia 1 12","label":"Ἀπολογία εἰς τὸ αὐτὸ πράγμα","url":"https://interlinea.aeterna-institute.org/library/greek/antiphon/text-4/12","api":"https://interlinea.aeterna-institute.org/api/v1/library/greek/antiphon/text-4/12"},"credit":{"text":"Antiphon, Τετραλογία Α΄, ed. Kenneth John Maidment. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0028.tlg002.local001/","quality":"proofread"}}