{"kind":"section","lang":"grc","language":"Ancient Greek","title":"Tetralogia 1 12","citation":"Antiphon, Tetralogia 1 12","ref":"12","level":null,"urn":"urn:cts:greekLit:tlg0028.tlg002:12","url":"https://interlinea.aeterna-institute.org/library/greek/antiphon/text-4/12","api":"https://interlinea.aeterna-institute.org/api/v1/library/greek/antiphon/text-4/12","markdown":"https://interlinea.aeterna-institute.org/library/greek/antiphon/text-4/12.md","author":{"name":"Antiphon","url":"https://interlinea.aeterna-institute.org/library/greek/antiphon"},"work":{"title":"Tetralogia 1","url":"https://interlinea.aeterna-institute.org/library/greek/antiphon/text-4","urn":"urn:cts:greekLit:tlg0028.tlg002"},"verse":false,"words":68,"text":"τούτους μὲν οὖν τούτων ἀξίους ὄντας ἀπίστους ἡγεῖσθε· ἐμὲ δὲ ἔκ γε τῶν προειργασμένων γνώσεσθε οὔτε ἐπιβουλεύοντα οὔτε τῶν οὐ προσηκόντων ὀρεγόμενον, ἀλλὰ τἀναντία τούτων πολλὰς μὲν καὶ μεγάλας εἰσφορὰς εἰσφέροντα, πολλὰ δὲ τριηραρχοῦντα, λαμπρῶς δὲ χορηγοῦντα, πολλοῖς δὲ ἐρανίζοντα, μεγάλας δὲ ὑπὲρ πολλῶν ἐγγύας ἀποτίνοντα, τὴν δὲ οὐσίαν οὐ δικαζόμενον ἀλλʼ ἐργαζόμενον κεκτημένον, φιλοθύτην δὲ καὶ νόμιμον ὄντα. τοιούτου δὲ ὄντος μου μηδὲν ἀνόσιον μηδὲ αἰσχρὸν καταγνῶτε.","prev":{"citation":"Tetralogia 1 10-11","label":"10 to 11","url":"https://interlinea.aeterna-institute.org/library/greek/antiphon/text-4/10","api":"https://interlinea.aeterna-institute.org/api/v1/library/greek/antiphon/text-4/10"},"next":{"citation":"Tetralogia 1 13","label":"Ἀπολογία εἰς τὸ αὐτὸ πράγμα","url":"https://interlinea.aeterna-institute.org/library/greek/antiphon/text-4/13","api":"https://interlinea.aeterna-institute.org/api/v1/library/greek/antiphon/text-4/13"},"credit":{"text":"Antiphon, Τετραλογία Α΄, ed. Kenneth John Maidment. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0028.tlg002.local001/","quality":"proofread"}}