{"kind":"section","lang":"grc","language":"Ancient Greek","title":"Tetralogia 2 8","citation":"Antiphon, Tetralogia 2 8","ref":"8","level":null,"urn":"urn:cts:greekLit:tlg0028.tlg003:8","url":"https://interlinea.aeterna-institute.org/library/greek/antiphon/text-5/8","api":"https://interlinea.aeterna-institute.org/api/v1/library/greek/antiphon/text-5/8","markdown":"https://interlinea.aeterna-institute.org/library/greek/antiphon/text-5/8.md","author":{"name":"Antiphon","url":"https://interlinea.aeterna-institute.org/library/greek/antiphon"},"work":{"title":"Tetralogia 2","url":"https://interlinea.aeterna-institute.org/library/greek/antiphon/text-5","urn":"urn:cts:greekLit:tlg0028.tlg003"},"verse":false,"words":79,"text":"ὁ δὲ παῖς βουλόμενος προδραμεῖν, τοῦ καιροῦ διαμαρτὼν ἐν ᾧ διατρέχων οὐκ ἂν ἐπλήγη, περιέπεσεν οἷς οὐκ ἤθελεν, ἀκουσίως δὲ ἁμαρτὼν εἰς ἑαυτὸν οἰκείαις συμφοραῖς κέχρηται, τῆς δʼ ἁμαρτίας τετιμωρημένος ἑαυτὸν ἔχει τὴν δίκην, οὐ συνηδομένων μὲν οὐδὲ συνεθελόντων ἡμῶν, συναλγούντων δὲ καὶ συλλυπουμένων. τῆς δὲ ἁμαρτίας εἰς τοῦτον ἡκούσης, τό τʼ ἔργον οὐχ ἡμέτερον ἀλλὰ τοῦ ἐξαμαρτόντος ἐστί, τό τε πάθος εἰς τὸν δράσαντα ἐλθὸν ἡμᾶς μὲν ἀπολύει τῆς αἰτίας, τὸν δὲ δράσαντα δικαίως ἅμα τῇ ἁμαρτίᾳ τετιμώρηται.","prev":{"citation":"Tetralogia 2 4-7","label":"4 to 7","url":"https://interlinea.aeterna-institute.org/library/greek/antiphon/text-5/4","api":"https://interlinea.aeterna-institute.org/api/v1/library/greek/antiphon/text-5/4"},"next":{"citation":"Tetralogia 2 9","label":"Ἀπολογία φόνου ἀκουσίου","url":"https://interlinea.aeterna-institute.org/library/greek/antiphon/text-5/9","api":"https://interlinea.aeterna-institute.org/api/v1/library/greek/antiphon/text-5/9"},"credit":{"text":"Antiphon, Τετραλογία Β΄, ed. Kenneth John Maidment. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0028.tlg003.local001/","quality":"proofread"}}