{"kind":"section","lang":"grc","language":"Ancient Greek","title":"De caede Herodis 38","citation":"Antiphon, De caede Herodis 38","ref":"38","level":null,"urn":"urn:cts:greekLit:tlg0028.tlg005:38","url":"https://interlinea.aeterna-institute.org/library/greek/antiphon/text/38","api":"https://interlinea.aeterna-institute.org/api/v1/library/greek/antiphon/text/38","markdown":"https://interlinea.aeterna-institute.org/library/greek/antiphon/text/38.md","author":{"name":"Antiphon","url":"https://interlinea.aeterna-institute.org/library/greek/antiphon"},"work":{"title":"De caede Herodis","url":"https://interlinea.aeterna-institute.org/library/greek/antiphon/text","urn":"urn:cts:greekLit:tlg0028.tlg005"},"verse":false,"words":91,"text":"καὶ οἱ μὲν ἄλλοι καθʼ ὧν ἂν μηνύῃ τις, οὗτοι κλέπτουσι τοὺς μηνύοντας, κᾆτʼ ἀφανίζουσιν· αὐτοὶ δὲ οὗτοι οἱ ἀπάγοντες καὶ ζητοῦντες τὸ πρᾶγμα τὸν κατʼ ἐμοῦ μηνυτὴν ἠφάνισαν. καὶ εἰ μὲν ἐγὼ τὸν ἄνδρα ἠφάνισα ἢ μὴ ἤθελον ἐκδοῦναι τούτοις ἢ ἄλλον τινὰ ἔφευγον ἔλεγχον, αὐτοῖς ἂν τούτοις ἰσχυροτάτοις εἰς τὰ πράγματα ἐχρῶντο, καὶ ἦν ταῦτα αὐτοῖς μέγιστα τεκμήρια κατʼ ἐμοῦ· νῦν δέ, ὁπότε αὐτοὶ οὗτοι προκαλουμένων τῶν φίλων τῶν ἐμῶν ταῦτʼ ἔφυγον, ἐμοὶ δήπου κατὰ τούτων εἶναι χρὴ ταὐτὰ ταῦτα τεκμήρια, ὡς οὐκ ἀληθῆ τὴν αἰτίαν ἐπέφερον ἣν ᾐτιῶντο.","prev":{"citation":"De caede Herodis 37","label":"Section 37","url":"https://interlinea.aeterna-institute.org/library/greek/antiphon/text/37","api":"https://interlinea.aeterna-institute.org/api/v1/library/greek/antiphon/text/37"},"next":{"citation":"De caede Herodis 39","label":"Section 39","url":"https://interlinea.aeterna-institute.org/library/greek/antiphon/text/39","api":"https://interlinea.aeterna-institute.org/api/v1/library/greek/antiphon/text/39"},"credit":{"text":"Antiphon, Περὶ τοῦ Ἡρῷδου φόνου, ed. Kenneth John Maidment. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0028.tlg005.local001/","quality":"proofread"}}