{"kind":"section","lang":"grc","language":"Ancient Greek","title":"De interpretatione 2","citation":"Aristotle, De interpretatione 2","ref":"2","level":null,"urn":"urn:cts:greekLit:tlg0086.tlg017:2","url":"https://interlinea.aeterna-institute.org/library/greek/aristotle/de-interpretatione/2","api":"https://interlinea.aeterna-institute.org/api/v1/library/greek/aristotle/de-interpretatione/2","markdown":"https://interlinea.aeterna-institute.org/library/greek/aristotle/de-interpretatione/2.md","author":{"name":"Aristotle","url":"https://interlinea.aeterna-institute.org/library/greek/aristotle"},"work":{"title":"De interpretatione","url":"https://interlinea.aeterna-institute.org/library/greek/aristotle/de-interpretatione","urn":"urn:cts:greekLit:tlg0086.tlg017"},"verse":false,"words":191,"text":"Ὄνομα μὲν οὖν ἐστὶ φωνὴ σημαντικὴ κατὰ συνθήκην ἄνευ χρόνου, ἧς μηδὲν μέρος ἐστὶ σημαντικὸν κεχωρισμένον· ἐν γὰρ τῷ Κάλλιππος τὸ ἵππος οὐδὲν αὐτὸ καθ᾿ ἑαυτὸ σημαίνει, ὥσπερ ἐν τῷ λόγῳ τῷ καλὸς ἵππος. Οὐ μὴν οὐδ᾿ ὥσπερ ἐν τοῖς ἁπλοῖς ὀνόμασιν, οὕτως ἔχει καὶ ἐν τοῖς συμπεπλεγμένοις· ἐν ἐκείνοις μὲν γὰρ τὸ μέρος οὐδαμῶς σημαντικόν, ἐν δὲ τούτοις βούλεται μέν, ἀλλ᾿ οὐδενὸς κεχωρισμένον, οἷον ἐν τῷ ἐπακτροκέλης τὸ κέλης οὐδὲν σημαίνει καθ᾿ ἑαυτό. Τὸ δὲ κατὰ συνθήκην, ὅτι φύσει τῶν ὀνομάτων οὐδέν ἐστιν, ἀλλ᾿ ὅταν γένηται σύμβολον, ἐπεὶ δηλοῦσί γέ τι καὶ οἱ ἀγράμματοι ψόφοι, οἷον θηρίων, ὧν οὐδέν ἐστιν ὄνομα. Τὸ δ᾿ οὐκ ἄνθρωπος οὐκ ὄνομα. Οὐ μὴν οὐδὲ κεῖται ὄνομα ὅ τι δεῖ καλεῖν αὐτό· οὔτε γὰρ λόγος οὔτε ἀπόφασίς ἐστιν. Ἀλλ᾿ ἔστω ὄνομα ἀόριστον, ὅτι ὁμοίως ἐφ᾿ ὁτουοῦν ὑπάρχει καὶ ὄντος καὶ μὴ ὄντος. Τὸ δὲ Φίλωνος ἢ Φίλωνι καὶ ὅσα τοιαῦτα, οὐκ ὀνόματα ἀλλὰ πτώσεις ὀνόματος. Λόγος δέ ἐστιν αὐτοῦ τὰ μὲν ἄλλα κατὰ τὰ αὐτά· ὅτι δὲ μετὰ τοῦ ἔστιν ἢ ἦν ἢ ἔσται οὐκ ἀληθεύει ἢ ψεύδεται, τὸ δὲ ὄνομα ἀεί· οἷον Φίλωνός ἐστιν ἢ οὐκ ἔστιν· οὐδὲν γάρ πω οὔτε ἀληθεύει οὔτε ψεύδεται.","prev":{"citation":"De interpretatione ΠΕΡΙ ΕΡΜΗΝΕΙΑΣ.","label":"ΠΕΡΙ ΕΡΜΗΝΕΙΑΣ.","url":"https://interlinea.aeterna-institute.org/library/greek/aristotle/de-interpretatione/%CE%A0%CE%95%CE%A1%CE%99%20%CE%95%CE%A1%CE%9C%CE%97%CE%9D%CE%95%CE%99%CE%91%CE%A3.","api":"https://interlinea.aeterna-institute.org/api/v1/library/greek/aristotle/de-interpretatione/%CE%A0%CE%95%CE%A1%CE%99%20%CE%95%CE%A1%CE%9C%CE%97%CE%9D%CE%95%CE%99%CE%91%CE%A3."},"next":{"citation":"De interpretatione 3","label":"Chapter 3","url":"https://interlinea.aeterna-institute.org/library/greek/aristotle/de-interpretatione/3","api":"https://interlinea.aeterna-institute.org/api/v1/library/greek/aristotle/de-interpretatione/3"},"credit":{"text":"Aristotle, De interpretatione, ed. Immanuel Bekker. Text: Open Greek and Latin (First1KGreek), via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0086.tlg017.local001/","quality":"proofread"}}