{"kind":"section","lang":"grc","language":"Ancient Greek","title":"Periplus ponti Euxini 4","citation":"Arrian, Periplus ponti Euxini 4","ref":"4","level":null,"urn":"urn:cts:greekLit:tlg0074.tlg004:4","url":"https://interlinea.aeterna-institute.org/library/greek/arrian/text-4/4","api":"https://interlinea.aeterna-institute.org/api/v1/library/greek/arrian/text-4/4","markdown":"https://interlinea.aeterna-institute.org/library/greek/arrian/text-4/4.md","author":{"name":"Arrian","url":"https://interlinea.aeterna-institute.org/library/greek/arrian"},"work":{"title":"Periplus ponti Euxini","url":"https://interlinea.aeterna-institute.org/library/greek/arrian/text-4","urn":"urn:cts:greekLit:tlg0074.tlg004"},"verse":false,"words":147,"text":"ἔστιν γάρ τοι καὶ ἐν Πόντῳ τῷ Εὐξείνῳ χωρίον οὕτω καλούμενον, καί τι καὶ Ἀθηνᾶς ἱερόν ἐστιν αὐτόθι Ἑλληνικόν, ὅθεν μοι δοκεῖ καὶ τὸ ὄνομα εἶναι τοῦτο τῷ χωρίῳ. καὶ φρούριόν τι ἐστὶν ἠμελημένον. ὁ δὲ ὅρμος οἷος ὥρᾳ ἔτους δέχεσθαι οὐ πολλὰς ναῦς καὶ σκέπην ταύταις παρέχειν ἀπὸ νότου ἀνέμου καὶ αὖ τοῦ εὔρου· σῴζοιτο δʼ ἂν καὶ τοῦ βορρᾶ τὰ ὁρμοῦντα πλοῖα, ἀλλʼ οὐ τοῦ γε ἀπαρκτίου οὐδὲ τοῦ θρᾳσκίου μὲν ἐν τῷ Πόντῳ, σκίρωνος δὲ ἐν τῇ Ἑλλάδι καλουμένου. ἐς δὲ τὴν νύκτα βρονταί τε σκληραὶ καὶ ἀστραπαὶ κατεῖχον, καὶ πνεῦμα οὐ τὸ αὐτὸ ἔτι, ἀλλʼ ἐς νότον μεθειστήκει, καὶ διʼ ὀλίγου ἀπὸ τοῦ νότου ἐς λίβα ἄνεμον, καὶ ταῖς ναυσὶν οὐκέτι ἀσφαλὴς ὁ ὅρμος ἦν. πρὶν οὖν παντάπασιν ἀγριωθῆναι τὴν θάλασσαν, ὅσας μὲν αὐτὸ τὸ χωρίον αἱ Ἀθῆναι δέξασθαι ἐδύναντο, ταύτας αὐτοῦ ἐνεωλκήσαμεν, πλὴν τῆς τριήρους· αὕτη γὰρ πέτρᾳ τινὶ ὑφορμοῦσα ἀσφαλῶς ἐσάλευεν.","prev":{"citation":"Periplus ponti Euxini 3","label":"Chapter 3","url":"https://interlinea.aeterna-institute.org/library/greek/arrian/text-4/3","api":"https://interlinea.aeterna-institute.org/api/v1/library/greek/arrian/text-4/3"},"next":{"citation":"Periplus ponti Euxini 5.1","label":"Chapter 5","url":"https://interlinea.aeterna-institute.org/library/greek/arrian/text-4/5.1","api":"https://interlinea.aeterna-institute.org/api/v1/library/greek/arrian/text-4/5.1"},"credit":{"text":"Arrian, Περίπλους τοῦ Εὐξείνου Πόντου, ed. Rudolf Hercher, Alfred Eberhard. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0074.tlg004.local001/","quality":"proofread"}}