{"kind":"section","lang":"grc","language":"Ancient Greek","title":"Epigrammata 1","citation":"Callimachus, Epigrammata 1","ref":"1","level":null,"urn":"urn:cts:greekLit:tlg0533.tlg004:1","url":"https://interlinea.aeterna-institute.org/library/greek/callimachus/text-2/1","api":"https://interlinea.aeterna-institute.org/api/v1/library/greek/callimachus/text-2/1","markdown":"https://interlinea.aeterna-institute.org/library/greek/callimachus/text-2/1.md","author":{"name":"Callimachus","url":"https://interlinea.aeterna-institute.org/library/greek/callimachus"},"work":{"title":"Epigrammata","url":"https://interlinea.aeterna-institute.org/library/greek/callimachus/text-2","urn":"urn:cts:greekLit:tlg0533.tlg004"},"verse":true,"words":115,"text":"ξεῖνος Ἀταρνείτης τις ἀνείρετο Πιττακὸν οὕτω\nτὸν Μυτιληναῖον, παῖδα τὸν Ὑρράδιον\nἄττα γέρον, δοιός με καλεῖ γάμος· ἡ μία μὲν δὴ\nνύμφη καὶ πλούτῳ καὶ γενεῇ κατʼ ἐμέ,\nἡ δʼ ἑτέρη προβέβηκε· τί λώιον; εἰ δʼ ἄγε σύμ μοι\nβούλευσον, ποτέρην εἰς ὑμέναιον ἄγω.\nεἶπεν· ὁ δέ σκίπωνα, γεροντικὸν ὅπλον, ἀείρας,\nἠνίδε, κεῖνοί σοι πᾶν ἐρέουσιν ἔπος.\nοἱ δʼ ἄρʼ ὑπὸ πληγῇσι θοὰς βέμβικας ἔχοντες\nἔστρεφον εὐρείῃ παῖδες ἐνὶ τριόδῳ.\nκείνων ἔρχεο, φησί, μετʼ ἴχνια. χὡ μὲν ἐπέστη\nπλησίον· οἱ δʼ ἔλεγον· τὴν κατὰ σαυτὸν ἔλα.\nταῦτʼ ἀίων ὁ ξεῖνος· ἐφείσατο μείζονος οἴκου\nδράξασθαι, παίδων κληδόνα συνθέμενος,\nτὴν δʼ ὀλίγην ὡς κεῖνος ἐς οἰκίον ἤγετο νύμφην.\nοὕτω καὶ σύ γʼ ἰὼν τὴν κατὰ σαυτὸν ἔλα.","prev":null,"next":{"citation":"Epigrammata 2","label":"Epigram 2","url":"https://interlinea.aeterna-institute.org/library/greek/callimachus/text-2/2","api":"https://interlinea.aeterna-institute.org/api/v1/library/greek/callimachus/text-2/2"},"credit":{"text":"Callimachus, Ἐπιγράμματα, ed. A. W. Mair. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0533.tlg004.local001/","quality":"proofread"}}