{"kind":"section","lang":"grc","language":"Ancient Greek","title":"εἰς Δία εἰς Δία..81-96","citation":"Callimachus, εἰς Δία εἰς Δία..81-96","ref":"εἰς Δία..81","level":null,"urn":"urn:cts:greekLit:tlg0533.tlg015:εἰς Δία..81-εἰς Δία..96","url":"https://interlinea.aeterna-institute.org/library/greek/callimachus/text-7/%CE%B5%E1%BC%B0%CF%82%20%CE%94%CE%AF%CE%B1..81","api":"https://interlinea.aeterna-institute.org/api/v1/library/greek/callimachus/text-7/%CE%B5%E1%BC%B0%CF%82%20%CE%94%CE%AF%CE%B1..81","markdown":"https://interlinea.aeterna-institute.org/library/greek/callimachus/text-7/%CE%B5%E1%BC%B0%CF%82%20%CE%94%CE%AF%CE%B1..81.md","author":{"name":"Callimachus","url":"https://interlinea.aeterna-institute.org/library/greek/callimachus"},"work":{"title":"εἰς Δία","url":"https://interlinea.aeterna-institute.org/library/greek/callimachus/text-7","urn":"urn:cts:greekLit:tlg0533.tlg015"},"verse":true,"words":129,"text":"δῶκας δὲ πτολίεθρα φυλασσέμεν, ἵζεο δʼ αὐτὸς\nἄκρηισʼ ἐν πολίεσσιν, ἐπόψιος οἵ τε δίκηισι\nλαὸν ὑπὸ σκολιῆισʼ οἵ τʼ ἔμπαλιν ἰθύνουσιν·\nἐν δὲ ῥυηφενίην ἔβαλές σφισιν, ἐν δʼ ἅλις ὄλβον·\nπᾶσι μέν, οὐ μάλα δʼ ἶσον. ἔοικε δὲ τεκμήρασθαι\nἡμετέρωι μεδέοντι· περιπρὸ γὰρ εὐρὺ βέβηκεν.\nἑσπέριος κεῖνός γε τελεῖ τά κεν ἦρι νοήσηι·\nἑσπέριος τὰ μέγιστα, τὰ μείονα δʼ, εὖτε νοήσηι.\nοἳ δὲ τὰ μὲν πλειῶνι, τὰ δʼ οὐχ ἑνί, τῶν δʼ ἀπὸ πάμπαν\nαὐτὸς ἄνην ἐκόλουσας, ἐνέκλασσας δὲ μενοινήν.\nχαῖρε μέγα Κρονίδη πανυπέρτατε, δῶτορ ἐάων,\nδῶτορ ἀπημονίης. τεὰ δʼ ἔργματα τίς κεν ἀείδοι;\nοὐ γένετʼ, οὐκ ἔσται· τίς καὶ Διὸς ἔργματʼ ἀείσει;\nχαῖρε πάτερ, χαῖρʼ αὖθι· δίδου δʼ ἀρετήν τʼ ἄφενός τε.\nοὔτʼ ἀρετῆς ἄτερ ὄλβος ἐπίσταται ἄνδρας ἀέξειν\nοὔτʼ ἀρετὴ ἀφένοιο· δίδου δʼ ἀρετήν τε καὶ ὄλβον.","prev":{"citation":"εἰς Δία εἰς Δία..42-80","label":"εἰς Δία., lines εἰς Δία..42-εἰς Δία..80","url":"https://interlinea.aeterna-institute.org/library/greek/callimachus/text-7/%CE%B5%E1%BC%B0%CF%82%20%CE%94%CE%AF%CE%B1..42","api":"https://interlinea.aeterna-institute.org/api/v1/library/greek/callimachus/text-7/%CE%B5%E1%BC%B0%CF%82%20%CE%94%CE%AF%CE%B1..42"},"next":null,"credit":{"text":"Callimachus, εἰς Δία, ed. Ulrich von Wilamowitz-Moellendorff. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0533.tlg015.local002/","quality":"proofread"}}