{"kind":"section","lang":"grc","language":"Ancient Greek","title":"Epigrammata 1","citation":"Callimachus, Epigrammata 1","ref":"1","level":null,"urn":"urn:cts:greekLit:tlg0533.tlg003:1","url":"https://interlinea.aeterna-institute.org/library/greek/callimachus/text/1","api":"https://interlinea.aeterna-institute.org/api/v1/library/greek/callimachus/text/1","markdown":"https://interlinea.aeterna-institute.org/library/greek/callimachus/text/1.md","author":{"name":"Callimachus","url":"https://interlinea.aeterna-institute.org/library/greek/callimachus"},"work":{"title":"Epigrammata","url":"https://interlinea.aeterna-institute.org/library/greek/callimachus/text","urn":"urn:cts:greekLit:tlg0533.tlg003"},"verse":true,"words":114,"text":"ξεῖνος Ἀταρνείτης τις ἀνήρετο Πιττακὸν οὕτω\nτὸν Μυτιληναῖον, παῖδα τὸν Ὑρράδιον·\nἄττα γέρον, δοιός με καλεῖ γάμος· ἡ μία μὲν δή\nνύμφη καὶ πλούτωι καὶ γενεῆι κατʼ ἐμέ,\nἡ δʼ ἑτέρη προβέβηκε· τί λώιον; εἰ δʼ ἄγε σύμ μοι\nβούλευσον, ποτέρην εἰς ὑμέναιον ἄγω.\nεἶπεν· ὁ δὲ σκίπωνα, γεροντικὸν ὅπλον, ἀείρας,\nἠνίδε, κεῖνοί τοι πᾶν ἐρέουσιν ἔπος.\nοἳ δʼ ἄρʼ ὑπὸ πληγῆισι θοὰς βέμβικας ἔχοντες\nἔστρεφον εὐρείηι παῖδες ἐνὶ τριόδωι.\nκείνων ἔρχεο φησὶ μετʼ ἴχνια. χὠ μὲν ἐπέστη\nπλησίον· οἳ δʼ ἔλεγον· τὴν κατὰ σαυτὸν ἔλα.\nταῦτʼ ἀίων δ̔ ξεῖνος ἒφείσατο μείζονος οἴκου\nδράξασθαι παίδων κληδόνι συνθέμενος.\nτὴν δʼ ὀλίγην ὡς κεῖνος ἐς οἰκίον ἤγετο νύμφην,\nοὕτω καὶ σύ, Δίων, τὴν κατὰ σαυτὸν ἔλα.","prev":null,"next":{"citation":"Epigrammata 2","label":"Epigram 2","url":"https://interlinea.aeterna-institute.org/library/greek/callimachus/text/2","api":"https://interlinea.aeterna-institute.org/api/v1/library/greek/callimachus/text/2"},"credit":{"text":"Callimachus, Ἐπιγράμματα, ed. Ulrich von Wilamowitz-Moellendorff. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0533.tlg003.local001/","quality":"proofread"}}