{"kind":"section","lang":"grc","language":"Ancient Greek","title":"Elementa 7","citation":"Euclid, Elementa 7","ref":"7","level":null,"urn":"urn:cts:greekLit:tlg1799.tlg001:7","url":"https://interlinea.aeterna-institute.org/library/greek/euclid/text/7","api":"https://interlinea.aeterna-institute.org/api/v1/library/greek/euclid/text/7","markdown":"https://interlinea.aeterna-institute.org/library/greek/euclid/text/7.md","author":{"name":"Euclid","url":"https://interlinea.aeterna-institute.org/library/greek/euclid"},"work":{"title":"Elementa","url":"https://interlinea.aeterna-institute.org/library/greek/euclid/text","urn":"urn:cts:greekLit:tlg1799.tlg001"},"verse":false,"words":259,"text":"μονάς ἐστιν, καθʼ ἣν ἕκαστον τῶν ὄντων ἓν λέγεται. ἀριθμὸς δὲ τὸ ἐκ μονάδων συγκείμενον πλῆθος. μέρος ἐστὶν ἀριθμὸς ἀριθμοῦ ὁ ἐλάσσων τοῦ μείζονος, ὅταν καταμετρῇ τὸν μείζονα. μέρη δέ, ὅταν μὴ καταμετρῇ. πολλαπλάσιος δὲ ὁ μείζων τοῦ ἐλάσσονος, ὅταν καταμετρῆται ὑπὸ τοῦ ἐλάσσονος. ἄρτιος ἀριθμός ἐστιν ὁ δίχα διαιρούμενος. περισσὸς δὲ ὁ μὴ διαιρούμενος δίχα ἢ μονάδι διαφέρων ἀρτίου ἀριθμοῦ. ἀρτιάκις ἄρτιος ἀριθμός ἐστιν ὁ ὑπὸ ἀρτίου ἀριθμοῦ μετρούμενος κατὰ ἄρτιον ἀριθμόν. ἀρτιάκις δὲ περισσός ἐστιν ὁ ὑπὸ ἀρτίου ἀριθμοῦ μετρούμενος κατὰ περισσὸν ἀριθμόν. . περισσάκις δὲ περισσὸς ἀριθμός ἐστιν ὁ ὑπὸ περισσοῦ ἀριθμοῦ μετρούμενος κατὰ περισσὸν ἀριθμόν. πρῶτος ἀριθμός ἐστιν ὁ μονάδι μόνῃ μετρούμενος. πρῶτοι πρὸς ἀλλήλους ἀριθμοί εἰσιν οἱ μονάδι μόνῃ μετρούμενοι κοινῷ μέτρῳ. σύνθετος ἀριθμός ἐστιν ὁ ἀριθμῷ τινι μετρούμενος. σύνθετοι δὲ πρὸς ἀλλήλους ἀριθμοί εἰσιν οἱ ἀριθμῷ τινι μετρούμενοι κοινῷ μέτρῳ. ἀριθμὸς ἀριθμὸν πολλαπλασιάζειν λέγεται, ὅταν, ὅσαι εἰσὶν ἐν αὐτῷ μονάδες, τοσαυτάκις συντεθῇ ὁ πολλαπλασιαζόμενος, καὶ γένηταί τις. ὅταν δὲ δύο ἀριθμοὶ πολλαπλασιάσαντες ἀλλήλους ποιῶσί τινα, ὁ γενόμενος ἐπίπεδος καλεῖται, πλευραὶ δὲ αὐτοῦ οἱ πολλαπλασιάσαντες ἀλλήλους ἀριθμοί. ὅταν δὲ τρεῖς ἀριθμοὶ πολλαπλασιάσαντες ἀλλήλους ποιῶσί τινα, ὁ γενόμενος στερεός ἐστιν, πλευραὶ δὲ αὐτοῦ οἱ πολλαπλασιάσαντες ἀλλήλους ἀριθμοί. τετράγωνος ἀριθμός ἐστιν ὁ ἰσάκις ἴσος ἢ ὑπὸ δύο ἴσων ἀριθμῶν περιεχόμενος. κύβος δὲ ὁ ἰσάκις ἴσος ἰσάκις ἢ ὑπὸ τριῶν ἴσων ἀριθμῶν περιεχόμενος. ἀριθμοὶ ἀνάλογόν εἰσιν, ὅταν ὁ πρῶτος τοῦ δευτέρου καὶ ὁ τρίτος τοῦ τετάρτου ἰσάκις ᾖ πολλαπλάσιος ἢ τὸ αὐτὸ μέρος ἢ τὰ αὐτὰ μέρη ὦσιν. ὅμοιοι ἐπίπεδοι καὶ στερεοὶ ἀριθμοί εἰσιν οἱ ἀνάλογον ἔχοντες τὰς πλευράς. τέλειος ἀριθμός ἐστιν ὁ τοῖς ἑαυτοῦ μέρεσιν ἴσος ὤν.","prev":{"citation":"Elementa 6.33","label":"Book 6, Type prop","url":"https://interlinea.aeterna-institute.org/library/greek/euclid/text/6.33","api":"https://interlinea.aeterna-institute.org/api/v1/library/greek/euclid/text/6.33"},"next":{"citation":"Elementa 7.1","label":"Book 7, Type prop","url":"https://interlinea.aeterna-institute.org/library/greek/euclid/text/7.1","api":"https://interlinea.aeterna-institute.org/api/v1/library/greek/euclid/text/7.1"},"credit":{"text":"Euclid, Στοιχεῖα, ed. Johan Ludvig Heiberg. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg1799.tlg001.local001/","quality":"proofread"}}