{"kind":"section","lang":"grc","language":"Ancient Greek","title":"Lex 2","citation":"Hippocrates, Lex 2","ref":"2","level":null,"urn":"urn:cts:greekLit:tlg0627.tlg014:2","url":"https://interlinea.aeterna-institute.org/library/greek/hippocrates/lex/2","api":"https://interlinea.aeterna-institute.org/api/v1/library/greek/hippocrates/lex/2","markdown":"https://interlinea.aeterna-institute.org/library/greek/hippocrates/lex/2.md","author":{"name":"Hippocrates","url":"https://interlinea.aeterna-institute.org/library/greek/hippocrates"},"work":{"title":"Lex","url":"https://interlinea.aeterna-institute.org/library/greek/hippocrates/lex","urn":"urn:cts:greekLit:tlg0627.tlg014"},"verse":false,"words":72,"text":"2. Χρὴ γὰρ, ὅστις μέλλει ἰητρικῆς ξύνεσιν ἀτρεκέως ἁρμόζεσθαι, τῶνδέ μιν ἐπήβολον γενέσθαι· φύσιος· διδασκαλίης· τόπου εὐφυέος· παιδομαθίης· φιλοπονίης· χρόνου. Πρῶτον μὲν οὖν πάντων δεῖ φύσιος· φύσιος γὰρ ἀντιπρησσούσης, κενεὰ πάντα· φύσιος δὲ ἐς τὸ ἄριστον ὁδηγεούσης, διδασκαλίη τέχνης γίνεται· ἣν μετὰ φρονήσιος δεῖ περιποιήσασθαι, παιδομαθέα γενόμενον ἐν τόπῳ, ὁκοῖος εὐφυὴς πρὸς μάθησιν ἔσται· ἔτι δὲ φιλοπονίην προσενέγκασθαι ἐς χρόνον πουλὺν, ὅκως ἡ μάθησις, ἐμφυσιωθεῖσα, δεξιῶς τε καὶ εὐαλδέως τοὺς καρποὺς ἐξενέγκηται.","prev":{"citation":"Lex ΝΟΜΟΣ.","label":"ΝΟΜΟΣ.","url":"https://interlinea.aeterna-institute.org/library/greek/hippocrates/lex/%CE%9D%CE%9F%CE%9C%CE%9F%CE%A3.","api":"https://interlinea.aeterna-institute.org/api/v1/library/greek/hippocrates/lex/%CE%9D%CE%9F%CE%9C%CE%9F%CE%A3."},"next":{"citation":"Lex 3","label":"Chapter 3","url":"https://interlinea.aeterna-institute.org/library/greek/hippocrates/lex/3","api":"https://interlinea.aeterna-institute.org/api/v1/library/greek/hippocrates/lex/3"},"credit":{"text":"Hippocrates, Lex, ed. Émile Littré. Text: Open Greek and Latin (First1KGreek), via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0627.tlg014.local001/","quality":"proofread"}}