{"kind":"section","lang":"grc","language":"Ancient Greek","title":"Epigrammata 4","citation":"Homer, Epigrammata 4","ref":"4","level":null,"urn":"urn:cts:greekLit:tlg0012.tlg003:4","url":"https://interlinea.aeterna-institute.org/library/greek/homer/text/4","api":"https://interlinea.aeterna-institute.org/api/v1/library/greek/homer/text/4","markdown":"https://interlinea.aeterna-institute.org/library/greek/homer/text/4.md","author":{"name":"Homer","url":"https://interlinea.aeterna-institute.org/library/greek/homer"},"work":{"title":"Epigrammata","url":"https://interlinea.aeterna-institute.org/library/greek/homer/text","urn":"urn:cts:greekLit:tlg0012.tlg003"},"verse":true,"words":113,"text":"Οἵῃ μ’ αἴσῃ δῶκε πατὴρ Ζεὺς κύρμα γενέσθαι,\nνήπιον αἰδοίης ἐπὶ γούνασι μητρὸς ἀτάλλων.\nἥν ποτ’ ἐπύργωσαν βουλῇ Διὸς αἰγιόχοιο\nλαοὶ Φρίκωνος, μάργων ἐπιβήτορες ἵππων,\nὁπλότεροι μαλεροῖο πυρὸς κρίνοντες Ἄρηα,\nΑἰολίδα Σμύρνην ἁλιγείτονα, ποντοτίνακτον,\nἥντε δι’ ἀγλαὸν εἶσιν ὕδωρ ἱεροῖο Μέλητος·\nἔνθεν ἀπορνύμεναι κοῦραι Διός, ἀγλαὰ τέκνα.\nἠθελέτην κλῇσαι δῖαν χθόνα καὶ πόλιν ἀνδρῶν.\nοἳ δ’ ἀπανηνάσθην ἱερὴν ὄπα, φῆμιν ἀοιδῆς,\nἀφραδίῃ· τῶν μέν τε παθών τις φράσσεται αὖτις,\nὅς σφιν ὀνείδεσσιν τὸν ἐμὸν διεμήσατο πότμον.\nκῆρα δ’ ἐγώ, τήν μοι θεὸς ὤπασε γεινομένῳ περ,\nτλήσομαι ἀκράαντα φέρων τετληότι θυμῷ·\nοὐδέ τί μοι φίλα γυῖα μένειν ἱεραῖς ἐν ἀγυιαῖς\nΚύμης ὁρμαίνουσι, μέγας δέ με θυμὸς ἐπείγει\nδῆμον ἐς ἀλλοδαπῶν ἰέναι, ὀλίγον περ ἐόντα.","prev":{"citation":"Epigrammata 3","label":"Epigram 3","url":"https://interlinea.aeterna-institute.org/library/greek/homer/text/3","api":"https://interlinea.aeterna-institute.org/api/v1/library/greek/homer/text/3"},"next":{"citation":"Epigrammata 5","label":"Epigram 5","url":"https://interlinea.aeterna-institute.org/library/greek/homer/text/5","api":"https://interlinea.aeterna-institute.org/api/v1/library/greek/homer/text/5"},"credit":{"text":"Homer, Ἐπιγράμματα, ed. Hugh G. Evelyn-White. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0012.tlg003.local001/","quality":"proofread"}}