{"kind":"section","lang":"grc","language":"Ancient Greek","title":"In Philippidem 37","citation":"Hyperides, In Philippidem 37","ref":"37","level":null,"urn":"urn:cts:greekLit:tlg0030.tlg004:37","url":"https://interlinea.aeterna-institute.org/library/greek/hyperides/text-4/37","api":"https://interlinea.aeterna-institute.org/api/v1/library/greek/hyperides/text-4/37","markdown":"https://interlinea.aeterna-institute.org/library/greek/hyperides/text-4/37.md","author":{"name":"Hyperides","url":"https://interlinea.aeterna-institute.org/library/greek/hyperides"},"work":{"title":"In Philippidem","url":"https://interlinea.aeterna-institute.org/library/greek/hyperides/text-4","urn":"urn:cts:greekLit:tlg0030.tlg004"},"verse":false,"words":81,"text":"ἔστι γάρ, ὦ ἄνδρες δικασταί, οὐχ οὗτος χρηστὸς πολίτης, ὅστις μικρὰ δοὺς πλείω βλάπτει τὰ κοινά, οὐδʼ ὅστις εἰς τὸ παραχρῆμα ἐξ ἀδίκου πορίσας κατέλυσε τῆς πόλεως τὴν ἐκ δικαίου πρόσοδον, ἀλλʼ ὅτῳ μέλει καὶ τῶν εἰς τὸν ἔπειτα χρόνον ὠφελίμων τῇ πόλει καὶ τῆς ὁμονοίας τῶν πολιτῶν καὶ τῆς δόξης τῆς ὑμετέρας· ὧν ἔνιοι οὐ φροντίζουσιν, ἀλλὰ τῶν ἐργαζομένων ἀφαιρούμενοι πόρους φασὶ τούτους πορίζειν, ἀπορίαν ἐν τῇ πόλει παρασκευάζοντες. ὅταν γὰρ ᾖ φοβερὸν τὸ κτᾶσθαι καὶ φείδεσθαι, τίς βουλήσεται κινδυνεύειν;","prev":{"citation":"In Philippidem 36","label":"Section 36","url":"https://interlinea.aeterna-institute.org/library/greek/hyperides/text-4/36","api":"https://interlinea.aeterna-institute.org/api/v1/library/greek/hyperides/text-4/36"},"next":{"citation":"In Philippidem 38","label":"Section 38","url":"https://interlinea.aeterna-institute.org/library/greek/hyperides/text-4/38","api":"https://interlinea.aeterna-institute.org/api/v1/library/greek/hyperides/text-4/38"},"credit":{"text":"Hyperides, Ὑπὲρ Εὐξενίππου ἐισαγγελίας ἀπολογία πρὸς Πολύευκτον, ed. J. O. Burtt. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0030.tlg004.local001/","quality":"proofread"}}