{"kind":"section","lang":"grc","language":"Ancient Greek","title":"Pro Euxenippo 12","citation":"Hyperides, Pro Euxenippo 12","ref":"12","level":null,"urn":"urn:cts:greekLit:tlg0030.tlg003:12","url":"https://interlinea.aeterna-institute.org/library/greek/hyperides/text-5/12","api":"https://interlinea.aeterna-institute.org/api/v1/library/greek/hyperides/text-5/12","markdown":"https://interlinea.aeterna-institute.org/library/greek/hyperides/text-5/12.md","author":{"name":"Hyperides","url":"https://interlinea.aeterna-institute.org/library/greek/hyperides"},"work":{"title":"Pro Euxenippo","url":"https://interlinea.aeterna-institute.org/library/greek/hyperides/text-5","urn":"urn:cts:greekLit:tlg0030.tlg003"},"verse":false,"words":112,"text":"βουλευομένοις δʼ ἡμῖν ἔδοξεν πορεύεσθαι πρὸς τοῦτον καὶ διαλέγεσθαι. καὶ καταλαβόντες αὐτὸν πρὸς τοῖς μυροπωλίοις ἠρωτῶμεν εἰ οὐκ αἰσχύνοιτο ψευδόμενος καὶ ἐνεδρεύσας ἡμᾶς ταῖς συνθήκαις, οὐ προειπὼν τὰ χρέα. ὁ δʼ ἀπεκρίνατο ἡμῖν ὡς οὔτε τὰ χρέα γιγνώσκοι ἃ λέγομεν, οὔτε προσέχοι ἡμῖν τὸν νοῦν, γραμματεῖόν τʼ εἴη αὐτῷ κείμενον πρὸς ἐμὲ περὶ τούτων. πολλῶν δʼ ἀνθρώπων ςυλλεγομένων καὶ ἐπακουόντων τοῦ πράγματος, διὰ τὸ ἐν τῇ ἀγορᾷ τοὺς λόγους γίγνεσθαι, καὶ κατατεμνόντων αὐτόν, κελευόντων τε ἀπάγειν ὡς ἀνδραποδιστήν, τοῦτο μὲν οὐκ ᾠόμεθα δεῖν ποιεῖν, προσεκαλεσάμεθα δὲ αὐτὸν εἰς ὑμᾶς κατὰ τὸν νόμον. πρῶτον μὲν οὖν ὑμῖν τὰς ςυνθήκας ἀναγνώσεται· ἐξ αὐτῶν γὰρ τῶν γεγραμμένων μαθήσεσθε τὴν ἐπιβουλὴν αὐτοῦ τούτου. λέγε τὰς συνθήκας.","prev":{"citation":"Pro Euxenippo 11","label":"Section 11","url":"https://interlinea.aeterna-institute.org/library/greek/hyperides/text-5/11","api":"https://interlinea.aeterna-institute.org/api/v1/library/greek/hyperides/text-5/11"},"next":{"citation":"Pro Euxenippo 13","label":"Section 13","url":"https://interlinea.aeterna-institute.org/library/greek/hyperides/text-5/13","api":"https://interlinea.aeterna-institute.org/api/v1/library/greek/hyperides/text-5/13"},"credit":{"text":"Hyperides, Κατ᾽ Ἀθηνογένους, ed. J. O. Burtt. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0030.tlg003.local001/","quality":"proofread"}}