{"kind":"section","lang":"grc","language":"Ancient Greek","title":"De vita Pythagorica 166","citation":"Iamblichus, De vita Pythagorica 166","ref":"166","level":null,"urn":"urn:cts:greekLit:tlg2023.tlg001:166","url":"https://interlinea.aeterna-institute.org/library/greek/iamblichus/text/166","api":"https://interlinea.aeterna-institute.org/api/v1/library/greek/iamblichus/text/166","markdown":"https://interlinea.aeterna-institute.org/library/greek/iamblichus/text/166.md","author":{"name":"Iamblichus","url":"https://interlinea.aeterna-institute.org/library/greek/iamblichus"},"work":{"title":"De vita Pythagorica","url":"https://interlinea.aeterna-institute.org/library/greek/iamblichus/text","urn":"urn:cts:greekLit:tlg2023.tlg001"},"verse":false,"words":143,"text":"καὶ ἐπὶ πλέον [ἐπειρῶντο] τὴν μνήμην γυμνάζειν· οὐδὲν γὰρ μεῖζον πρὸς ἐπιστήμην καὶ ἐμπειρίαν καὶ φρόνησιν τοῦ δύνασθαι μνημονεύειν. ἀπὸ δὴ τούτων τῶν ἐπιτηδευμάτων συνέβη τὴν Ἰταλίαν πᾶσαν φιλοσόφων ἀνδρῶν ἐμπλησθῆναι, καὶ πρότερον ἀγνοουμένης αὐτῆς, ὕστερον διὰ Πυθαγόραν μεγάλην Ἑλλάδα κληθῆναι, καὶ πλείστους παρ’ αὐτοῖς ἄνδρας φιλοσόφους καὶ ποιητὰς καὶ νομοθέτας γενέσθαι. τάς τε γὰρ τέχνας τὰς ῥητορικὰς καὶ τοὺς λόγους τοὺς ἐπιδεικτικοὺς καὶ τοὺς νόμους τοὺς γεγραμμένους παρ’ ἐκείνων εἰς τὴν Ἑλλάδα συνέβη κομισθῆναι, καὶ περὶ τῶν φυσικῶν ὅσοι τινὰ μνείαν πεποίηνται, πρῶτον Ἐμπεδοκλέα καὶ Παρμενίδην τὸν Ἐλεάτην προφερόμενοι τυγχάνουσιν, οἵ τε γνωμολογῆσαί τι τῶν κατὰ τὸν βίον βουλόμενοι τὰς Ἐπιχάρμου διανοίας προφέρονται, καὶ σχεδὸν πάντες αὐτὰς οἱ φιλόσοφοι κατέχουσι. περὶ μὲν οὖν τῆς σοφίας αὐτοῦ καὶ πῶς ἅπαντας ἀνθρώπους ἐπὶ πλεῖστον εἰς αὐτὴν προεβίβασεν, ἐφ’ ὅσον ἕκαστος οἷός τε ἦν μετέχειν αὐτῆς, καὶ ὡς παρέδωκεν αὐτὴν τελέως, διὰ τούτων ἡμῖν εἰρήσθω.","prev":{"citation":"De vita Pythagorica 165","label":"ΚΘ.","url":"https://interlinea.aeterna-institute.org/library/greek/iamblichus/text/165","api":"https://interlinea.aeterna-institute.org/api/v1/library/greek/iamblichus/text/165"},"next":{"citation":"De vita Pythagorica 167","label":"Λ.","url":"https://interlinea.aeterna-institute.org/library/greek/iamblichus/text/167","api":"https://interlinea.aeterna-institute.org/api/v1/library/greek/iamblichus/text/167"},"credit":{"text":"Iamblichus, περὶ τοῦ Πυθαγορικοῦ βίου λόγος, ed. August Nauck. Text: Open Greek and Latin (First1KGreek), via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg2023.tlg001.local001/","quality":"proofread"}}