{"kind":"section","lang":"grc","language":"Ancient Greek","title":"Antidosis 207","citation":"Isocrates, Antidosis 207","ref":"207","level":null,"urn":"urn:cts:greekLit:tlg0010.tlg019:207","url":"https://interlinea.aeterna-institute.org/library/greek/isocrates/text-13/207","api":"https://interlinea.aeterna-institute.org/api/v1/library/greek/isocrates/text-13/207","markdown":"https://interlinea.aeterna-institute.org/library/greek/isocrates/text-13/207.md","author":{"name":"Isocrates","url":"https://interlinea.aeterna-institute.org/library/greek/isocrates"},"work":{"title":"Antidosis","url":"https://interlinea.aeterna-institute.org/library/greek/isocrates/text-13","urn":"urn:cts:greekLit:tlg0010.tlg019"},"verse":false,"words":93,"text":"ἔτι τοίνυν ὑμῶν αὐτῶν οὐδεὶς ἔστιν ὅστις οὐκ ἂν εἰπεῖν ἔχοι πολλοὺς τῶν συμπαιδευθέντων, οἳ παῖδες μὲν ὄντες ἀμαθέστατοι τῶν ἡλικιωτῶν ἔδοξαν εἶναι, πρεσβύτεροι δὲ γενόμενοι πλέον διήνεγκαν πρὸς τὸ φρονεῖν καὶ λέγειν τῶν αὐτῶν τούτων ὧν παῖδες ὄντες ἀπελείφθησαν. ὅθεν μάλιστʼ ἄν τις γνοίη τὴν ἐπιμέλειαν ὅσην ἔχει δύναμιν· δῆλον γὰρ ὅτι τότε μὲν ἅπαντες τοιαύταις ἐχρῶντο ταῖς διανοίαις οἵας περ ἐξ ἀρχῆς ἔφυσαν ἔχοντες, ἄνδρες δὲ γενόμενοι τούτων διήνεγκαν καὶ μετήλλαξαν τὴν φρόνησιν τῷ τοὺς μὲν ἐκκεχυμένως ζῆν καὶ ῥᾳθύμως, τοὺς δὲ τοῖς τε πράγμασι καὶ σφίσιν αὐτοῖς προσέχειν τὸν νοῦν.","prev":{"citation":"Antidosis 206","label":"Section 206","url":"https://interlinea.aeterna-institute.org/library/greek/isocrates/text-13/206","api":"https://interlinea.aeterna-institute.org/api/v1/library/greek/isocrates/text-13/206"},"next":{"citation":"Antidosis 208","label":"Section 208","url":"https://interlinea.aeterna-institute.org/library/greek/isocrates/text-13/208","api":"https://interlinea.aeterna-institute.org/api/v1/library/greek/isocrates/text-13/208"},"credit":{"text":"Isocrates, Περὶ ἀντιδόσεως, ed. George Norlin. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0010.tlg019.local001/","quality":"proofread"}}