{"kind":"section","lang":"grc","language":"Ancient Greek","title":"On the Sublime 14","citation":"Longinus, On the Sublime 14","ref":"14","level":null,"urn":"urn:cts:greekLit:tlg0560.tlg001:14","url":"https://interlinea.aeterna-institute.org/library/greek/longinus/text/14","api":"https://interlinea.aeterna-institute.org/api/v1/library/greek/longinus/text/14","markdown":"https://interlinea.aeterna-institute.org/library/greek/longinus/text/14.md","author":{"name":"Longinus","url":"https://interlinea.aeterna-institute.org/library/greek/longinus"},"work":{"title":"On the Sublime","url":"https://interlinea.aeterna-institute.org/library/greek/longinus/text","urn":"urn:cts:greekLit:tlg0560.tlg001"},"verse":false,"words":158,"text":"Οὐκοῦν καὶ ἡμᾶς, ἡνίκ’ ἂν διαπονῶμεν ὑψηγορίας τι καὶ μεγαλοφροσύνης δεόμενον, καλὸν ἀναπλάττεσθαι ταῖς ψυχαῖς, πῶς ἂν εἰ τύχοι ταὐτὸ τοῦθ’ Ὅμηρος εἶπεν, πῶς δ᾽ ἂν Πλάτων ἢ Δημοσθένης ὕψωσαν ἢ ἐν ἱστορίᾳ Θουκυδίδης. προσπίπτοντα γὰρ ἡμῖν κατὰ ζῆλον ἐκεῖνα τὰ πρόσωπα καὶ οἷον διαπρέποντα, τὰς ψυχὰς ἀνοίσει πως πρὸς τὰ ἀνειδωλοποιούμενα μέτρα· ἔτι δὲ μᾶλλον, εἰ κἀκεῖνο τῇ διανοίᾳ προσυπογράφοιμεν, πῶς ἂν τόδε τι ὑπʼ ἐμοῦ λεγόμενον παρὼν Ὅμηρος ἤκουσεν ἢ Δημοσθένης, ἢ πῶς ἂν ἐπὶ τούτῳ διετέθησαν· τῷ γὰρ ὄντι μέγα τὸ ἀγώνισμα, τοιοῦτον ὑποτίθεσθαι τῶν ἰδίων λόγων δικαστήριον καὶ θέατρον, καὶ ἐν τηλικούτοις ἥρωσι κριταῖς τε καὶ μάρτυσιν ὑπέχειν τῶν γραφομένων εὐθύνας πεπαῖχθαι. πλέον δὲ τούτων παρορμητικόν, εἰ προστιθείης, πῶς ἂν ἐμοῦ ταῦτα γράψαντος ὁ μετ’ ἐμὲ πᾶς ἀκούσειεν αἰών; εἰ δέ τις αὐτόθεν φοβοῖτο, μὴ τοῦ ἰδίου βίου καὶ χρόνου φθέγξαιτό τι ὑπερήμερον, ἀνάγκη καὶ τὰ συλλαμβανόμενα ὑπὸ τῆς τούτου ψυχῆς ἀτελῆ καὶ τυφλὰ ὥσπερ ἀμβλοῦσθαι, πρὸς τὸν τῆς ὑστεροφημίας ὅλως μὴ τελεσφορούμενα χρόνον.","prev":{"citation":"On the Sublime 13.4","label":"Chapter 13","url":"https://interlinea.aeterna-institute.org/library/greek/longinus/text/13.4","api":"https://interlinea.aeterna-institute.org/api/v1/library/greek/longinus/text/13.4"},"next":{"citation":"On the Sublime 15.1","label":"Chapter 15","url":"https://interlinea.aeterna-institute.org/library/greek/longinus/text/15.1","api":"https://interlinea.aeterna-institute.org/api/v1/library/greek/longinus/text/15.1"},"credit":{"text":"Longinus, Περὶ ὕψους, ed. William Rhys Roberts. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0560.tlg001.local001/","quality":"proofread"}}