{"kind":"section","lang":"grc","language":"Ancient Greek","title":"Parallela minora 32","citation":"Plutarch, Parallela minora 32","ref":"32","level":null,"urn":"urn:cts:greekLit:tlg0007.tlg085:32","url":"https://interlinea.aeterna-institute.org/library/greek/plutarch/text-113/32","api":"https://interlinea.aeterna-institute.org/api/v1/library/greek/plutarch/text-113/32","markdown":"https://interlinea.aeterna-institute.org/library/greek/plutarch/text-113/32.md","author":{"name":"Plutarch","url":"https://interlinea.aeterna-institute.org/library/greek/plutarch"},"work":{"title":"Parallela minora","url":"https://interlinea.aeterna-institute.org/library/greek/plutarch/text-113","urn":"urn:cts:greekLit:tlg0007.tlg085"},"verse":false,"words":158,"text":"ἐν τῷ Πελοποννησιακῷ πολέμῳ ΠεισίστρατοςὈρχομένιος τοὺς μὲν εὐγενεῖς ἐμίσει, τοὺς δʼ εὐτελεῖς ἐφίλει. ἐβουλεύσαντο δὲ οἱ ἐν τῇ βουλῇ φονεῦσαι, καὶ διακόψαντες αὐτὸν εἰς τοὺς κόλπους ἔβαλον, καὶ τὴν γῆν ἔξυσαν. ὁ δὲ δημότης ὄχλος ὑπόνοιαν λαβὼν ἔδραμεν εἰς τὴν βουλήν. ὁ δὲ νεώτερος υἱὸς τοῦ βασιλέως Τλησίμαχος εἰδὼς τὴν συνωμοσίαν ἀπὸ τῆς ἐκκλησίας ἀπέσπασε τὸν ὄχλον, εἰπὼν ἑωρακέναι τὸν πατέρα μεθʼ ὁρμῆς εἰς τὸ Πισαῖον ὄρος φέρεσθαι, μείζονα μορφὴν ἀνθρώπου κεκτημένον. καὶ οὕτως ἠπατήθη ὁ ὄχλος· ὡς Θεόφιλος ἐν δευτέρῳ Πελοποννησιακῶν. διά τοὺς ἀστυγείτονας πολέμους ἡ σύγκλητος τῶν Ῥωμαίων τοῦ δήμου τὸ σιτόμετρον ἦρε· Ῥωμύλος δὲ ὁ βασιλεὺς βαρέως ἐνεγκὼν τῷ δήμῳ ἀπέδωκε· πολλοὺς δὲ τῶν μειζόνων ἐκόλαζεν. οἱ δὲ φονεύσαντες αὐτὸν ἐν τῇ συγκλήτῳ βουλῇ καὶ διακόψαντες εἰς τοὺς κόλπους ἔβαλον. Ῥωμαῖοι δὲ μετὰ πυρὸς εἰς τὴν σύγκλητον ἔδραμον. Ἰούλιος δὲ Πρόκλος τῶν ἐπισήμων ἀνὴρ εἶπε τὸν Ῥωμύλον ἐν ὄρει ἑωρακέναι μείζονα παντὸς ἀνθρώπου θεὸν τε γεγενῆσθαι. Ῥωμαῖοι δὲ πιστεύσαντες ἀνεχώρησαν ὡς Ἀριστόβουλος ἐν τρίτῳ Ἰταλικῶν.","prev":{"citation":"Parallela minora 31","label":"Section 31","url":"https://interlinea.aeterna-institute.org/library/greek/plutarch/text-113/31","api":"https://interlinea.aeterna-institute.org/api/v1/library/greek/plutarch/text-113/31"},"next":{"citation":"Parallela minora 33","label":"Section 33","url":"https://interlinea.aeterna-institute.org/library/greek/plutarch/text-113/33","api":"https://interlinea.aeterna-institute.org/api/v1/library/greek/plutarch/text-113/33"},"credit":{"text":"Plutarch, Συναγωγὴ ἱστοριῶν παραλλήλων Ἑλληνικῶν καὶ Ῥωμαϊκῶν, ed. Frank Cole Babbitt. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0007.tlg085.local001/","quality":"proofread"}}