{"kind":"section","lang":"grc","language":"Ancient Greek","title":"Historiae 23-2","citation":"Polybius, Historiae 23-2","ref":"23-2","level":null,"urn":"urn:cts:greekLit:tlg0543.tlg001:23-2","url":"https://interlinea.aeterna-institute.org/library/greek/polybius/text/23-2","api":"https://interlinea.aeterna-institute.org/api/v1/library/greek/polybius/text/23-2","markdown":"https://interlinea.aeterna-institute.org/library/greek/polybius/text/23-2.md","author":{"name":"Polybius","url":"https://interlinea.aeterna-institute.org/library/greek/polybius"},"work":{"title":"Historiae","url":"https://interlinea.aeterna-institute.org/library/greek/polybius/text","urn":"urn:cts:greekLit:tlg0543.tlg001"},"verse":false,"words":158,"text":"ὅτι τοῦ Δημητρίου παραγενηθέντος ἐκ τῆς Ῥώμης εἰς τὴν Μακεδονίαν καὶ κομίζοντος τὰς ἀποκρίσεις, ἐν αἷς οἱ Ῥωμαῖοι πᾶσαν τὴν ἐξ αὑτῶν χάριν καὶ πίστιν εἰς τὸν Δημήτριον ἀπηρείδοντο καὶ διὰ τοῦτον ἔφασαν πάντα πεποιηκέναι καὶ ποιήσειν, οἱ μὲν Μακεδόνες ἀπεδέχοντο τὸν Δημήτριον, μεγάλων ὑπολαμβάνοντες ἀπολελύσθαι φόβων καὶ κινδύνων — προσεδόκων γὰρ ὅσον οὔπω τὸν ἀπὸ Ῥωμαίων πόλεμον ἐπʼ αὐτοὺς ἥξειν διὰ τὰς τοῦ Φιλίππου παρατριβάς — ὁ δὲ Φίλιππος καὶ Περσεὺς οὐχ ἡδέως ἑώρων τὸ γινόμενον, οὐδʼ ἤρεσεν αὐτοῖς τὸ δοκεῖν τοὺς Ῥωμαίους αὐτῶν μὲν μηθένα λόγον ποιεῖσθαι, τῷ δὲ Δημητρίῳ πᾶσαν ἀνατιθέναι τὴν ἐξ αὑτῶν χάριν. οὐ μὴν ἀλλʼ ὁ μὲν Φίλιππος ἐπεκρύπτετο τὴν ἐπὶ τούτοις δυσαρέστησιν, ὁ δὲ Περσεύς, οὐ μόνον ἐν τῇ πρὸς Ῥωμαίους εὐνοίᾳ παρὰ πολὺ τἀδελφοῦ λειπόμενος, ἀλλὰ καὶ περὶ τἄλλα πάντα καθυστερῶν καὶ τῇ φύσει καὶ τῇ κατασκευῇ, δυσχερῶς ἔφερε· τὸ δὲ συνέχον, ἐδεδίει περὶ τῆς ἀρχῆς, μὴ πρεσβύτερος ὢν ἐξωσθῇ διὰ τὰς προειρημένας αἰτίας. διὸ τούς τε φίλους ἔφθειρε τοὺς τοῦ Δημητρίου . —","prev":{"citation":"Historiae 23","label":"Book 23, ιι. ρες γραεξιαε","url":"https://interlinea.aeterna-institute.org/library/greek/polybius/text/23","api":"https://interlinea.aeterna-institute.org/api/v1/library/greek/polybius/text/23"},"next":{"citation":"Historiae 23.8","label":"Book 23, Chapter 8","url":"https://interlinea.aeterna-institute.org/library/greek/polybius/text/23.8","api":"https://interlinea.aeterna-institute.org/api/v1/library/greek/polybius/text/23.8"},"credit":{"text":"Polybius, Ἱστορίαι, ed. Theodor Büttner-Wobst. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0543.tlg001.local001/","quality":"proofread"}}