{"kind":"section","lang":"grc","language":"Ancient Greek","title":"Historiae 36-2","citation":"Polybius, Historiae 36-2","ref":"36-2","level":null,"urn":"urn:cts:greekLit:tlg0543.tlg001:36-2","url":"https://interlinea.aeterna-institute.org/library/greek/polybius/text/36-2","api":"https://interlinea.aeterna-institute.org/api/v1/library/greek/polybius/text/36-2","markdown":"https://interlinea.aeterna-institute.org/library/greek/polybius/text/36-2.md","author":{"name":"Polybius","url":"https://interlinea.aeterna-institute.org/library/greek/polybius"},"work":{"title":"Historiae","url":"https://interlinea.aeterna-institute.org/library/greek/polybius/text","urn":"urn:cts:greekLit:tlg0543.tlg001"},"verse":false,"words":125,"text":"ὅτι Ῥωμαῖοι ἔπεμψαν πρεσβευτὰς τοὺς ἐπιληψομένους τῆς ὁρμῆς τῆς τοῦ Νικομήδους καὶ κωλύσοντας τὸν Ἄτταλον πολεμεῖν τῷ Προυσίᾳ, καὶ κατεστάθησαν Μάρκος Λικίννιος, ἄνθρωπος ποδαγρικὸς καὶ τελείως ἀδύνατος τοῖς ποσί, καὶ μετὰ τοῦτον Αὖλος Μαγκῖνος, ὃς κεραμίδος εἰς τὴν κεφαλὴν ἐμπεσούσης αὐτῷ τηλικαύτας καὶ τοσαύτας οὐλὰς εἶχε διὰ τῆς κεφαλῆς ὥστε θαυμαστὸν εἶναι πῶς ἐσώθη, καὶ Λεύκιος Μαλλέολος, ὃς πάντων ἐδόκει Ῥωμαίων ἀναισθητότατος ὑπάρχειν. τῆς δὲ πράξεως προσδεομένης τάχους καὶ τόλμης ἐδόκουν ἀφυέστατοι πρὸς τὴν χρείαν εἶναι ταύτην οἱ καθεσταμένοι. διὸ καί φασι Μάρκον Πόρκιον τὸν Κάτωνα προσαγορευόμενον εἰπεῖν ἐν συγκλήτῳ διότι συμβήσεται μὴ μόνον ἀπολόμενον φθάσαι τὸν Προυσίαν, ἀλλὰ καὶ τὸν Νικομήδην γηράσαντʼ ἐν τῇ βασιλείᾳ· πῶς γὰρ οἷόν τε καταταχῆσαι, πῶς δὲ καταταχήσασαν ἀνύσασθαί τι τὴν πρεσβείαν, μήτε πόδας μήτε κεφαλὴν μήτε καρδίαν ἔχουσαν. —","prev":{"citation":"Historiae 36.13","label":"Book 36, Chapter 13","url":"https://interlinea.aeterna-institute.org/library/greek/polybius/text/36.13","api":"https://interlinea.aeterna-institute.org/api/v1/library/greek/polybius/text/36.13"},"next":{"citation":"Historiae 36.15","label":"Book 36, Chapter 15","url":"https://interlinea.aeterna-institute.org/library/greek/polybius/text/36.15","api":"https://interlinea.aeterna-institute.org/api/v1/library/greek/polybius/text/36.15"},"credit":{"text":"Polybius, Ἱστορίαι, ed. Theodor Büttner-Wobst. Text: Perseus Digital Library, via The Greek Library, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0543.tlg001.local001/","quality":"proofread"}}