{"kind":"section","lang":"grc","language":"Ancient Greek","title":"Enquiry into Plants 8.4-4","citation":"Theophrastus, Enquiry into Plants 8.4-4","ref":"8.4-4","level":null,"urn":"urn:cts:greekLit:tlg0093.tlg001:8.4-4","url":"https://interlinea.aeterna-institute.org/library/greek/theophrastus/enquiry-into-plants/8.4-4","api":"https://interlinea.aeterna-institute.org/api/v1/library/greek/theophrastus/enquiry-into-plants/8.4-4","markdown":"https://interlinea.aeterna-institute.org/library/greek/theophrastus/enquiry-into-plants/8.4-4.md","author":{"name":"Theophrastus","url":"https://interlinea.aeterna-institute.org/library/greek/theophrastus"},"work":{"title":"Enquiry into Plants","url":"https://interlinea.aeterna-institute.org/library/greek/theophrastus/enquiry-into-plants","urn":"urn:cts:greekLit:tlg0093.tlg001"},"verse":false,"words":137,"text":"χρῶνται δὲ ταῖς μὲν ῥίζαις ἀντὶ ξύλων οὐ μόνον τῷ κάειν ἀλλὰ καὶ τῷ σκεύη ἄλλα ποιεῖν ἐξ αὐτῶν παντοδαπά· πολὺ γὰρ ἔχει τὸ ξύλον καὶ καλόν. αὐτὸς δὲ ὁ πάπυρος πρὸς πλεῖστα χρήσιμος· καὶ γὰρ πλοῖα ποιοῦσιν ἐξ αὐτοῦ, καὶ ἐκ τῆς βίβλου ἱστία τε πλέκουσι καὶ ψιάθους καὶ ἐσθῆτά τινα καὶ στρωμνὰς καὶ σχοινία τε καὶ ἕτερα πλείω. καὶ ἐμφανέστατα δὴ τοῖς ἔξω τὰ βιβλία· μάλιστα δὲ καὶ πλείστη βοήθεια πρὸς τὴν τροφὴν ἀπ’ αὐτοῦ γίνεται. μασῶνται γὰρ ἅπαντες οἱ ἐν τῇ χώρᾳ τὸν πάπυρον καὶ ὠμὸν καὶ ἑφθὸν καὶ ὀπτόν· καὶ τὸν μὲν χυλὸν καταπίνουσι, τὸ δὲ μάσημα ἐκβάλλουσιν. ὁ μὲν οὖν πάπυρος τοιοῦτός τε καὶ ταύτας παρέχεται τὰς χρείας. γίνεται δὲ καὶ ἐν Συρίᾳ περὶ τὴν λίμνην ἐν ᾗ καὶ ὁ κάλαμος ὁ εὐώδης· ὅθεν καὶ Ἀντίγονος εἰς τὰς ναῦς ἐποιεῖτο τὰ σχοινία.","prev":{"citation":"Enquiry into Plants 8.3-4","label":"Δ, Chapter 8","url":"https://interlinea.aeterna-institute.org/library/greek/theophrastus/enquiry-into-plants/8.3-4","api":"https://interlinea.aeterna-institute.org/api/v1/library/greek/theophrastus/enquiry-into-plants/8.3-4"},"next":{"citation":"Enquiry into Plants 8.5-3","label":"Δ, Chapter 8","url":"https://interlinea.aeterna-institute.org/library/greek/theophrastus/enquiry-into-plants/8.5-3","api":"https://interlinea.aeterna-institute.org/api/v1/library/greek/theophrastus/enquiry-into-plants/8.5-3"},"credit":{"text":"Theophrastus, Enquiry into Plants, ed. Arthur Hort. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://thegreeklibrary.pages.lisn.upsaclay.fr/works/tlg0093.tlg001.local001/","quality":"proofread"}}