{"kind":"section","lang":"la","language":"Latin","title":"Ald. Carm. eccl. 1","citation":"Aldhelm, Ald. Carm. eccl. 1","ref":"1","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/1","api":"https://interlinea.aeterna-institute.org/api/v1/library/latin/aldhelm/ald-carm-eccl/1","markdown":"https://interlinea.aeterna-institute.org/library/latin/aldhelm/ald-carm-eccl/1.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":136,"text":"I.\nIN BASILICA SANCTORVM PETRI ET PAVLI.\nHic celebranda rudis florescit gloria templi,\nLimpida quae sacri signat vexilla triumphi;\nHic Petrus et Paulus, tenebrosi lumina mundi,\nPraecipui patres, populi qui frena gubernant,\nCarminibus crebris alma venerantur in aula.\nClaviger aetherius, portam qui pandis in aethra,\nCandida caelorum recludens regna Tonantis,\nAusculta clemens populorum vota precantum,\nMarcida qui riguis umectant imbribus ora;\nSuscipe singultus commissa piacla gementum,\nQui prece flagranti torrent peccamina vitae!\nMaximus et doctor, patulo vocitatus ab axe,\nCum cuperes Christo priscos praeponere ritus,\nSaulus, qui dictus mutato nomine Paulus\nPost tenebras claram coepisti cernere lucem,\nVocibus orantum nunc aures pande benignas\nEt tutor tremulis cum Petro porrige dextram,\nSacra frequentantes aulae qui limina lustrant,\nQuatenus hic scelerum detur indulgentia perpes\nLarga de pietate fluens et fonte superno,\nDignis qui numquam populis torpescit in aevum!","prev":null,"next":{"citation":"Ald. Carm. eccl. 2","label":"Part 2","url":"https://interlinea.aeterna-institute.org/library/latin/aldhelm/ald-carm-eccl/2","api":"https://interlinea.aeterna-institute.org/api/v1/library/latin/aldhelm/ald-carm-eccl/2"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}