{"kind":"section","lang":"la","language":"Latin","title":"Ald. Carm. eccl. 2","citation":"Aldhelm, Ald. Carm. eccl. 2","ref":"2","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/2","api":"https://interlinea.aeterna-institute.org/api/v1/library/latin/aldhelm/ald-carm-eccl/2","markdown":"https://interlinea.aeterna-institute.org/library/latin/aldhelm/ald-carm-eccl/2.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":196,"text":"II.\nIN BASILICA BEATAE MARIAE SEMPER VIRGINIS.\nHanc aulam Domini servat tutela Mariae,\nCui veneranda rudis sacrantur culmina templi\nEt nova consurgunt sacris vexilla triumphis.\nHac celebratur honor sacrae genetricis in aula,\nQuae verum genuit lumen de lumine patris;\nQuem clamant Titan almo spiramine vates.\nFemina praepollens et sacra puerpera virgo,\nAudi clementer populorum vota precantum,\nMarcida qui riguis umectant imbribus ora\nAc genibus tundunt curvato poplite terram,\nDum veniam fuso lacrimarum fonte merentur\nEt crebris precibus delent peccamina vitae!\nHaec, inquam, virgo caelesti pignore feta\nEdidit ex alvo salvantem saecula regem,\nImperium mundi solus qui iure gubernat,\nUt dudum angelico discit virguncula fatu,\nCum pater altithronus Gabrihel misisset ab astris.\nHaec fuit, egregius quam promit carmine vates,\nQui Solimis quondam dives regnavit in arvis:\nHortus conclusus florenti vertice vernans,\nFons quoque signatus caelesti gurgite pollens\nNecnon et turtur tremulus; cui praescius infit\nAngelus: 'En sobolem generabis virgo perennem\nAtque puerperium paritura puerpera gignes;\nFilius altithroni faustus vocitetur in aevum!\nSpiritus e caelo veniet sanctissimus in te:\nVirtus ecce tuo confert umbracula cordi;\nPatris obumbrabit te, virgo, celsa potestas.'\nQuo dictu matri turgescunt viscera fetu,\nQui genitus mundum miseranda labe resolvit\nAtque crucifixus polluta piacula tersit.","prev":{"citation":"Ald. Carm. eccl. 1","label":"Part 1","url":"https://interlinea.aeterna-institute.org/library/latin/aldhelm/ald-carm-eccl/1","api":"https://interlinea.aeterna-institute.org/api/v1/library/latin/aldhelm/ald-carm-eccl/1"},"next":{"citation":"Ald. Carm. eccl. 3.1-49","label":"III. 〈in Ecclesia Mariae a Bugge Exstructa〉., lines 3.1-3.49","url":"https://interlinea.aeterna-institute.org/library/latin/aldhelm/ald-carm-eccl/3.1","api":"https://interlinea.aeterna-institute.org/api/v1/library/latin/aldhelm/ald-carm-eccl/3.1"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}