{"kind":"section","lang":"la","language":"Latin","title":"Ald. Carm. eccl. 3.50-85","citation":"Aldhelm, Ald. Carm. eccl. 3.50-85","ref":"3.50","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/3.50","api":"https://interlinea.aeterna-institute.org/api/v1/library/latin/aldhelm/ald-carm-eccl/3.50","markdown":"https://interlinea.aeterna-institute.org/library/latin/aldhelm/ald-carm-eccl/3.50.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":212,"text":"Fratres concordi laudemus voce Tonantem\nCantibus et crebris conclamet turba sororum;\nYmnos ac psalmos et responsoria festis\nCongrua promamus subter testudine templi\nPsalterii melos fantes modulamine crebro\nAtque decem fidibus nitamur tendere liram,\nUt psalmista monet bis quinis psallere fibris;\nUnusquisque novum comat cum voce sacellum\nEt lector lectrixve volumina sacra revolvant!\nIstam nempe diem, qua templi festa coruscant,\nNativitate sua sacravit virgo Maria,\nQuam iugiter renovant Augusti tempora mensis,\nDividitur medio dum torrens Sextilis orbe;\nQui nobis iterum restaurat gaudia mentis,\nDum vicibus redeunt solemnia festa Mariae\nEt veneranda piis flagrant altaria donis.\nHaec domus interius resplendet luce serena,\nQuam sol per vitreas illustret forte fenestras\nLimpida quadrato diffundens lumina templo.\nPlurima basilicae sunt ornamenta recentis:\nAurea contortis flavescunt pallia filis,\nQuae sunt altaris sacri velamina pulchra,\nAureus atque calix gemmis fulgescit opertus,\nUt caelum rutilat stellis ardentibus aptum,\nAc lata argento constat fabricata patena:\nQuae divina gerunt nostrae medicamina vitae;\nCorpore nam Christi sacroque cruore nutrimur.\nHic crucis ex auro splendescit lamina fulvo\nArgentique simul gemmis ornata metalla;\nHic quoque turibulum capitellis undique cinctum\nPendit de summo fumosa foramina pandens,\nDe quibus ambrosia spirabunt tura Sabaea,\nQuando sacerdotes missas offerre iubentur.\nNunc clara ingenito dicatur gloria patri\nNec minus et genito promatur gloria nato\nSpiritus atque sacer consorti laude fruatur!","prev":{"citation":"Ald. Carm. eccl. 3.1-49","label":"III. 〈in Ecclesia Mariae a Bugge Exstructa〉., lines 3.1-3.49","url":"https://interlinea.aeterna-institute.org/library/latin/aldhelm/ald-carm-eccl/3.1","api":"https://interlinea.aeterna-institute.org/api/v1/library/latin/aldhelm/ald-carm-eccl/3.1"},"next":{"citation":"Ald. Carm. eccl. 4","label":"Part 4","url":"https://interlinea.aeterna-institute.org/library/latin/aldhelm/ald-carm-eccl/4","api":"https://interlinea.aeterna-institute.org/api/v1/library/latin/aldhelm/ald-carm-eccl/4"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}