{"kind":"section","lang":"la","language":"Latin","title":"Ald. Carm. eccl. 4.1","citation":"Aldhelm, Ald. Carm. eccl. 4.1","ref":"4.1","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/4.1","api":"https://interlinea.aeterna-institute.org/api/v1/library/latin/aldhelm/ald-carm-eccl/4.1","markdown":"https://interlinea.aeterna-institute.org/library/latin/aldhelm/ald-carm-eccl/4.1.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":219,"text":"Hanc Petrus absidam sanctorum sorte coronat,\nClaviger aethereus, qui portam pandit in aethra,\nIanitor aeternae recludens limina vitae;\nOmnibus hic geminum digessit dogma per orbem,\nQuod binis constat descriptum rite libellis,\nPectore qui patulo Christi praecepta capessunt.\nUt prius aequoreas captabat rete catervas\nLinea squamigeris extendens vincula turmis,\nSic hominum cuneos mundi de gurgite raptos\nDucit ad aeternum caelesti remige regnum,\nUt sibi salvator vera cum voce spopondit,\nQuando piscantem panda de puppe vocavit.\nQui ponti pedibus caleavit caerula glauci,\nSed mare mergentem tumidis non sorbuit undis,\nDextera dum Christi turgentia marmora pressit;\nCuius praestabat defunctis umbra medelam,\nDum sani rursus redeunt ad lumina vitae,\nQuamvis ante nigrae lustrassent limina mortis.\nHic quoque poplitibus nec non et crure gemello\nClaudum restaurat fretus virtute Tonantis\nEt cito sanatis praecepit pergere plantis,\nQuem prius ad templum gestabant forte propinqui.\nHic etiam binos multavit morte malignos,\nQui pretium fundi celarant fraude nefandum;\nInsuper et magicum falsi fantasma Simonis\nFunditus evacuans tetras detrusit in umbras\nRomanum vulgus solvens errore vetusto,\nQui praecelsa rudis scandit fastigia turris\nAtque coronatus lauri de fronde volavit,\nSed mox aethereas dimittens furcifer auras\nCernuus ad terram confractis ossibus ambro\nCorruit, et Petro cessit victoria belli;\nQui cruce confixus gaudens tormenta luebat\nHorrida crudelis passurus vulnera ferri;\nQuem Deus aeternis ornatum iure triumphis\nArbiter omnipotens ad caeli culmina vexit.","prev":{"citation":"Ald. Carm. eccl. 4","label":"Part 4","url":"https://interlinea.aeterna-institute.org/library/latin/aldhelm/ald-carm-eccl/4","api":"https://interlinea.aeterna-institute.org/api/v1/library/latin/aldhelm/ald-carm-eccl/4"},"next":{"citation":"Ald. Carm. eccl. 4.2","label":"Part 4, II. in Sancti Pauli.","url":"https://interlinea.aeterna-institute.org/library/latin/aldhelm/ald-carm-eccl/4.2","api":"https://interlinea.aeterna-institute.org/api/v1/library/latin/aldhelm/ald-carm-eccl/4.2"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}