{"kind":"section","lang":"la","language":"Latin","title":"Ald. Carm. eccl. 4.2","citation":"Aldhelm, Ald. Carm. eccl. 4.2","ref":"4.2","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/4.2","api":"https://interlinea.aeterna-institute.org/api/v1/library/latin/aldhelm/ald-carm-eccl/4.2","markdown":"https://interlinea.aeterna-institute.org/library/latin/aldhelm/ald-carm-eccl/4.2.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":217,"text":"Saulus, qui sanctas multavit carcere turbas,\nCredulus efficitur mutato nomine Paulus,\nPlurima frugiferis dispergens semina verbis.\nDe quo sacra seges mundi succrevit in occa;\nQuem Deus infidum caeli clamavit ab arce:\n'Quid me persequeris dura cum calce refragans?'\nErgo diem ac noctem ponti sub gurgite mersus\nMagna supernarum meruit spectacula rerum;\nTertia caelorum raptus fastigia scandit\nAtque poli proceros vidit cum mente maniplos.\nQuem pithonissa procax clamavit voce proterva:\nSpiritus abscessit Paulo purgante puellam\nIn vacuasque procul fugiens evanuit auras.\nEffebum puerum lustrantem tartara mortis\nSuscitat in proprias anima penetrante medullas.\nNonne magum merito geminis fraudavit ocellis,\nCerneret ut numquam splendentem lumine Phoebum?\nCruribus atque suris claudum restaurat egrotum,\nQuem fortuna prius gressu privavit egentem;\nSic patrem Pupli, quem febris torsit anhela,\n(Torridus atque calor frigus brumale coquebat\nNec non extales multavit poena pudenda)\nCuravit citius Domino tribuente medelam.\nDum sarmenta pius glomeraret Paulus ad ignem,\nTorribus ut pellat brumosis frigora nimbis,\nVipera dira manum letali dente momordit;\nSed Paulus gelidum non sensit vulnere virus\nLaedere nec sanctum valuit crudele venenum;\nDenique squamosa contectum pelle celydrum\nProtinus in flammas torrendum tradidit atras.\nPostquam complevit labentis tempora vitae,\nMartirium rubro quaesivit sanguine sacrum\nPurpureusque cruor venarum fonte cucurrit.\nOssa tegat tellus quamvis modo mole sepulcri,\nAst tamen in proceras conscendit spiritus arces\nCoetibus angelicis nimbosa per aethera ductus.","prev":{"citation":"Ald. Carm. eccl. 4.1","label":"Part 4, I. in Sancti Petri.","url":"https://interlinea.aeterna-institute.org/library/latin/aldhelm/ald-carm-eccl/4.1","api":"https://interlinea.aeterna-institute.org/api/v1/library/latin/aldhelm/ald-carm-eccl/4.1"},"next":{"citation":"Ald. Carm. eccl. 4.3","label":"Part 4, III. in Sancti Andreae.","url":"https://interlinea.aeterna-institute.org/library/latin/aldhelm/ald-carm-eccl/4.3","api":"https://interlinea.aeterna-institute.org/api/v1/library/latin/aldhelm/ald-carm-eccl/4.3"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}