{"kind":"section","lang":"la","language":"Latin","title":"Ald. Carm. eccl. 4.6","citation":"Aldhelm, Ald. Carm. eccl. 4.6","ref":"4.6","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/4.6","api":"https://interlinea.aeterna-institute.org/api/v1/library/latin/aldhelm/ald-carm-eccl/4.6","markdown":"https://interlinea.aeterna-institute.org/library/latin/aldhelm/ald-carm-eccl/4.6.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":144,"text":"Hic Thomas, Didymus nomen sortitus Achivum,\nServat sacratum sarta testudine templum,\nVulnera qui tangens crudeli cuspide gesta\nCredidit extemplo salvantem saecla monarchum,\nQuamvis ante foret sociis incredulus almis\nAtque fidem dubio gestaret corde sinistram,\nDum chaos inferni surgens de morte vedemptor\nLinqueret abstrusum vasta comitante caterva;\nSed mox ambiguum convertit rubra cicatrix\nDiscipulo palpante trucis vulnuscula ferri,\nDum foribus clausis, trepidans qua turba latebat,\nPacifer intraret Christus salvator in aulam.\nHunc igitur soboles misit veneranda Tonantis\nEoas gentes almis convertere biblis\nPlurima magnificis patrantem signa triumphis.\nIndia tum sacris coluit simulacra nefandis\nDoctrinis veterum stolidis instructa parentum,\nSed confessa fidem Thoma lucrante salutem\nCredidit in Christum, caeli qui sceptra gubernat.\nDenique transacto praesentis tempore vitae\nProtinus aethereum Thomas lustravit Olimpum;\nQuem fani flamen veteris cultorque sacelli\nSanguine rorantem rigido transverberat ense\nPraemia sumpturum, cum tellus sponte dehiscet\nOmnia de priscis et surgent corpora tumbis.","prev":{"citation":"Ald. Carm. eccl. 4.5","label":"Part 4, V. in Sancti Iohannis Apostoli et Evangelistae.","url":"https://interlinea.aeterna-institute.org/library/latin/aldhelm/ald-carm-eccl/4.5","api":"https://interlinea.aeterna-institute.org/api/v1/library/latin/aldhelm/ald-carm-eccl/4.5"},"next":{"citation":"Ald. Carm. eccl. 4.7","label":"Part 4, VII. in Sancti Iacobi Apostoli.","url":"https://interlinea.aeterna-institute.org/library/latin/aldhelm/ald-carm-eccl/4.7","api":"https://interlinea.aeterna-institute.org/api/v1/library/latin/aldhelm/ald-carm-eccl/4.7"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}