{"kind":"section","lang":"la","language":"Latin","title":"Ald. Carm. eccl. 4.7","citation":"Aldhelm, Ald. Carm. eccl. 4.7","ref":"4.7","level":null,"urn":null,"url":"https://interlinea.aeterna-institute.org/library/latin/aldhelm/ald-carm-eccl/4.7","api":"https://interlinea.aeterna-institute.org/api/v1/library/latin/aldhelm/ald-carm-eccl/4.7","markdown":"https://interlinea.aeterna-institute.org/library/latin/aldhelm/ald-carm-eccl/4.7.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. Carm. eccl.","url":"https://interlinea.aeterna-institute.org/library/latin/aldhelm/ald-carm-eccl","urn":null},"verse":true,"words":204,"text":"Nec non Iacobus Christi matertera cretus\nEt consobrini felici nomine fretus\nHanc aedem Domini de summo servat Olimpo;\nQuem plebs Iudaea scaevo bachante tumultu\nPulsum de pinna fullonis sude necavit,\nQuod Christum populis scandens fastigia templi\nConcionaretur crebro sermone sacerdos.\nIn cuius genibus cutis callosa refertur,\nDum crebris vicibus oraret voce Tonantem\nPoplitibus flexis tundens pavimenta sacelli.\nLanea villosi sprevit velamina pepli\nLinea brumosis sumens mantilia flabris;\nSic quoque flagrantem contempnens corpore nardum\nThermarum penitus neglexit pectore pompas;\nNon cirros capitis ferrata forfice dempsit\nNec culter malas vestis lanugine rasit.\nCuius virtutum tanta praeconia constant,\nUt vindicta necis, quam dira morte luebat,\nInteritus fieret Solimae populique ruina,\nDum Titus Caesar densa comitante caterva\nCum genitore simul Romanis arcibus orto\nUrbem ferriferis vallarent milibus amplam,\nDonec dira fames consumpsit strage catervas\nMoenibus obstructas et muri carcere saeptas.\nTempore quo tenerum mactavit femina natum,\nInsuper assandum veribus transfixit acutis;\nQuem coctum laribus crudelis mater edebat\nHumanae penitus naturae iura resolvens:\nHorresco referens effebi funus acerbum.\nSic vindicta crucis multavit clade nefandos,\nSic quoque Iacobi multavit passio sontes!\nUndecies centena simul cecidisse leguntur\nMilia per miseram moribundis civibus urbem;\nInsuper et centum venduntur milia passim,\nQuos rigidus ferri neglectos mucro reliquit\nEt famis exigua fugerunt funera stipe.","prev":{"citation":"Ald. Carm. eccl. 4.6","label":"Part 4, VI. in Sancti Thomae Apostoli.","url":"https://interlinea.aeterna-institute.org/library/latin/aldhelm/ald-carm-eccl/4.6","api":"https://interlinea.aeterna-institute.org/api/v1/library/latin/aldhelm/ald-carm-eccl/4.6"},"next":{"citation":"Ald. Carm. eccl. 4.8","label":"Part 4, VIII. in Sancti Philippi.","url":"https://interlinea.aeterna-institute.org/library/latin/aldhelm/ald-carm-eccl/4.8","api":"https://interlinea.aeterna-institute.org/api/v1/library/latin/aldhelm/ald-carm-eccl/4.8"},"credit":{"text":"Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}