{"kind":"section","lang":"la","language":"Latin","title":"Ald. epp. 40-46","citation":"Aldhelm, Ald. epp. 40-46","ref":"40","level":null,"urn":null,"url":"https://interlinea.aeterna-institute.org/library/latin/aldhelm/ald-epp/40","api":"https://interlinea.aeterna-institute.org/api/v1/library/latin/aldhelm/ald-epp/40","markdown":"https://interlinea.aeterna-institute.org/library/latin/aldhelm/ald-epp/40.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. epp.","url":"https://interlinea.aeterna-institute.org/library/latin/aldhelm/ald-epp","urn":null},"verse":false,"words":276,"text":"Erat namque genus quoddam hereticorum aput orientales, quod tessereskaedecaditae vocatur id est quartadecimani , eo quod quarta decima luna cum Judeis Christum blasphemantibus et margaritas evangelii ritu porcorum calcantibus paschae solemnitatem peragunt et ob hoc alieni a beata orthodoxorum sodalitate inter scismaticorum conciliabula infeliciter reputantur , quos beatum Augustinum in libro de nonaginta heresibus scripto commemorrasse memini. Illud vero quam valde a fide catholica discrepat et ab evangelica traditione discordat , quod ultra Sabrinae fluminis fretum Demetarum sacerdotes de privata propriae conversationis munditia gloriantes nostram communionem magnopere abominantur in tantum, ut nec in ecclesia nobiscum orationum officia celebrare nec ad mensam ciborum fercula pro caritatis gratia pariter percipere dignentur! Quin immo fragmenta ferculorum et reliquias epularum lurconum canum rictibus et immundis devorandas porcis proiciunt; vascula quoque et fialas aut harenosis sablonum glareis aut fulvis favillarum cineribus expianda purgandaque praecipiunt. Non salutatio pacifica praebetur, non osculum piae fraternitatis offertur dicente apostolo: Salutate vos in osculo sancto! Nec manibus lomentum aut latex cum manutergio exhibetur neque pedibus ad lavacrum pelvis apponitur, cum salvator | sindone praecinctus discipulorum pedes abluens normam nobis tradiderit imitandi dicens: Sicut ego feci vobis, ita et vos facite aliis! Ast vero, si quilibet de nostris id est catholicis ad eos habitandi gratia perrexerint, non prius ad consortium sodalitatis suae adsciscere dignantur, quam quadraginta dierum spatia in penitendo peragere compellantur, et in hoc hereticos infeliciter imitantur, qui se catharos id est mundos nuncupare voluerunt. Heu, heu! pro tantis erroribus potius quam evax, evax! lacrimosis vocibus et querulosis singultibus lugubriter ingeminandum reor et totum hoc contra evangelii praecepta secundum Phariseorum inanes traditiones agere noscuntur Christo veraciter adstipulante: Vae vobis, scribae et Pharisei, qui mundatis . quod foris est calicis et parapsidis.","prev":{"citation":"Ald. epp. 34-39","label":"34 to 39","url":"https://interlinea.aeterna-institute.org/library/latin/aldhelm/ald-epp/34","api":"https://interlinea.aeterna-institute.org/api/v1/library/latin/aldhelm/ald-epp/34"},"next":{"citation":"Ald. epp. 47-53","label":"47 to 53","url":"https://interlinea.aeterna-institute.org/library/latin/aldhelm/ald-epp/47","api":"https://interlinea.aeterna-institute.org/api/v1/library/latin/aldhelm/ald-epp/47"},"credit":{"text":"Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}