{"kind":"section","lang":"la","language":"Latin","title":"Ald. epp. 47-53","citation":"Aldhelm, Ald. epp. 47-53","ref":"47","level":null,"urn":null,"url":"https://interlinea.aeterna-institute.org/library/latin/aldhelm/ald-epp/47","api":"https://interlinea.aeterna-institute.org/api/v1/library/latin/aldhelm/ald-epp/47","markdown":"https://interlinea.aeterna-institute.org/library/latin/aldhelm/ald-epp/47.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. epp.","url":"https://interlinea.aeterna-institute.org/library/latin/aldhelm/ald-epp","urn":null},"verse":false,"words":277,"text":"Nam dominus cum publicanis et peccatoribus convivia celebrasse describitur, ut verus medicus purulentis animarum vulneribus divinae pietatis medicamina et caelestis clementiae cataplasma componeret. Idcirco peccatorum consortia Phariseorum more minime dispexit, sed potius illam peccatricem pollutae vitae piacula lugubriter deflentem et dominicos pedes fusis lacrimarum imbribus umectantem ac solutis et laxis cincinnorum crinibus tergentem solita clementia misericorditer refocilat dicens: Remittantur illi peccata multa, quia dilexit multum. Quae cum ita se habeant, propter communem caelestis patriae sortem et angelicae sodalitatis collegium subnixis precibus et flexis poplitibus vestram fraternitatem adiurantes suppliciter efflagitamus, ut ulterius doctrinam et decreta beati Petri contumaci cordis supercilio et protervo pectore non abominemini et traditionem ecclesiae Romanae propter prisca priorum statuta vestrorum nequaquam tyrannica freti pertinacia arroganter aspernemini. Petrus namque Dei filium beata voce confessus audire meruit: Tu es Petrus et super hanc petram aedificabo ecclesiam meam et portae inferni non praevalebunt adversus eam et tibi dabo claves regni caelorum | usque solutum et in caelo. Si ergo Petro claves caelestis regni a Christo collatae sunt, de quo poeta ait Claviger aetherius, portam qui pandit in aethra, quis ecclesiae eius statuta principalia spernens et doctrinae mandata contemnens per caelestis paradisi portam gratulabundus ingreditur? Et si ipse potestatem ligandi atque monarchiam solvendi in caelo et in terra felici sorte et peculiari privilegio accipere promeruit, quis paschalis festi regulam et tonsurae Romanae ritum refutans non potius se strictis nexibus inextricabiliter obligandum quam dementer absolvendum ullatenus arbitretur? Sed fortasse quilibet strofosus librorum lector ac sagax scripturarum disceptator tali se excusationis clipeo defendat et tali se apologiae parma protegat 'Ego, inquiens, utriusque instrumenti praecepta sincera fide veneror ac sanctae trinitatis unam essentiam unamque substantiam et trinam personarum subsistentiam corde credulo confiteor.","prev":{"citation":"Ald. epp. 40-46","label":"40 to 46","url":"https://interlinea.aeterna-institute.org/library/latin/aldhelm/ald-epp/40","api":"https://interlinea.aeterna-institute.org/api/v1/library/latin/aldhelm/ald-epp/40"},"next":{"citation":"Ald. epp. 54-60","label":"54 to 60","url":"https://interlinea.aeterna-institute.org/library/latin/aldhelm/ald-epp/54","api":"https://interlinea.aeterna-institute.org/api/v1/library/latin/aldhelm/ald-epp/54"},"credit":{"text":"Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}