{"kind":"section","lang":"la","language":"Latin","title":"Ald. epp. 61-63","citation":"Aldhelm, Ald. epp. 61-63","ref":"61","level":null,"urn":null,"url":"https://interlinea.aeterna-institute.org/library/latin/aldhelm/ald-epp/61","api":"https://interlinea.aeterna-institute.org/api/v1/library/latin/aldhelm/ald-epp/61","markdown":"https://interlinea.aeterna-institute.org/library/latin/aldhelm/ald-epp/61.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. epp.","url":"https://interlinea.aeterna-institute.org/library/latin/aldhelm/ald-epp","urn":null},"verse":false,"words":302,"text":"Pateor, sodalitatis fraternae cliens altique municipatus municeps, postquam vestram repedantem istuc ambrosiam ex Hiberniae brumosis circionis insulae climatibus, ubi| ter bino circiter annorum circulo uber sofiae sugens metabatur, territorii marginem Britannici sospitem applicuisse rumigerulis referentibus comperimus, ilico, ut flammiger flagransque flagitabat amor, ineffabiles altithrono grates pansis in edito utrimque volis tripudiantes obtulimus, potissimum quod te exulem almus arbiter priscam paterni visitantem clientelam ruris caerula trans ponti glauca inormesque dodrantium glareas atque spumiferas limphae obstirpationes circili carina procellosum sulcante salum reducere ovante nauarco dignatus est, ut, ubi dudum incunabulis tirocinii editus rudibus adulto tenus pubertatis aevo adoleveras, nunc versa vice superna opitulanti praerogativa affatim fultus ab incolatu externi ruris repatrians praeceptoris vocamine indepto sortitoque fretus fungaris. Illud aeque almitati beatitudinis vestrae ex penetralibus praecordii nequaquam promens dissimulo propalare ad augmentum 〈simmistis〉 mistisque, ut reor, tripudii, immo ad doxam onomatis cyrii magnopere inolevisse, quod praeconio citra modum rumoris Scottico in solo degentium, quorum contubernio parumper fretus es, ceu tonitruali quodam boatu fragore nimboso emergenti auditus nostri quatiuntur et per tot tantaque telluris stadia lectionis opinio pagis provinciisque devulgata crebrescit, siquidem tam creber meatus est istinc illincque istuc illucque navigero aequoreas fretantium calle gurgites velut quaedam contribula apium germanitas nectar fabre conficientium. Nam quemadmodum alternatim reciproca facessante noctis nebula mellifluum examen, emergente axe tenus aequore Titane, glescentium culmina tiliarum per florulenta ad crates graciles sarcinatum flava baiolans gestamina asportat, eodem modo, ni fallor, lurconum conglobatio lectorum, tunning tat frid, ac residua sagax discipulorum caterva florigeris agiographae ex arvis non solum artes grammaticas atque geometricas bisternasque omissas fisicae artis machinas, quin immo allegoricae potiora ac tropologicae disputationis bipertita bis oracula aethralibus | opacorum mellita in aenigmatibus problematum siticulose sumentes carpunt et in alveariis sofiae iugi meditatione letotenus servanda condentes abdunt, e quorum catalogo tuam proficisci solertiam praeda onustam atque torrentis fluentis sacrosancti propinatam redundantemque excellens fama percrebruit.","prev":{"citation":"Ald. epp. 54-60","label":"54 to 60","url":"https://interlinea.aeterna-institute.org/library/latin/aldhelm/ald-epp/54","api":"https://interlinea.aeterna-institute.org/api/v1/library/latin/aldhelm/ald-epp/54"},"next":{"citation":"Ald. epp. 64-70","label":"64 to 70","url":"https://interlinea.aeterna-institute.org/library/latin/aldhelm/ald-epp/64","api":"https://interlinea.aeterna-institute.org/api/v1/library/latin/aldhelm/ald-epp/64"},"credit":{"text":"Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}