{"kind":"section","lang":"la","language":"Latin","title":"Ald. epp. 71-78","citation":"Aldhelm, Ald. epp. 71-78","ref":"71","level":null,"urn":null,"url":"https://interlinea.aeterna-institute.org/library/latin/aldhelm/ald-epp/71","api":"https://interlinea.aeterna-institute.org/api/v1/library/latin/aldhelm/ald-epp/71","markdown":"https://interlinea.aeterna-institute.org/library/latin/aldhelm/ald-epp/71.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. epp.","url":"https://interlinea.aeterna-institute.org/library/latin/aldhelm/ald-epp","urn":null},"verse":false,"words":293,"text":"Quamvis enim praedictum Hiberniae rus discentium opulans vernansque, ut ita dixerim, pascuosa numerositate lectorum, quemadmodum poli cardines astriferis micantium vibraminibus siderum, ornetur: ast tamen climatis Britannia occidui in extremo ferme orbis margine posita verbi gratia ceu solis flammigeri et luculento lunae specimine potiatur, id est Theodoro infula pontificatus fungenti ab ipso tirocinio rudimentorum in flore philosophicae artis adulto necnon et eiusdem sodalitatis cliente Hadriano dumtaxat urbanitate enucleata ineffabiliter praedito! Et audacter in propatulo contestans pellaci falsitatis fribulo neglecto aequa veritatis censura trutinante discernam: etiamsi beatae memoriae Theodorus summi sacerdotii gubernacula regens Hibernensium globo discipulorum , ceu aper truculentus molosorum catasta ringente vallatus, stipetur, limato perniciter grammatico dente iactura dispendii carens rebelles falanges discutit et utpote belliger in meditullio campi arcister legionum falangibus saeptus aemulorum spissis: mox nervosis tenso lacertorum volis arcu spiculisque ex faretra exemptis, hoc est chronographiae opacis acutisque syllogismis, turma supercilii tyfo turgens amissa ancilium testudine terga dantes latebras antrorum atras triumphante victore praepropere petunt. Neu tamen haec philosophando Scotticos sciolos, quorum | gemmato tua sagacitas dogmatum favo aliquantisper abusa est, sugillare a quoquam autumer, quippe cum satagerem praeconium cudens affabiliter texere nostrorum, non sugillationem ridiculose cachinnans rumigerare vestrorum! Sed potius iocistae scurraeque ritu dicacitate temeraria loquentium fraternae hironia dilectionis obtentu cavillabatur; si vero quippiam, inscitia suppeditante garrula, frontose convincitur pagina prompsisse, ut versidicus ait, Digna fiat fante Glingio: gurgo fugax fambulo! Neu timeat scriptor terrentis ludicra linguae! Sic semper cupiunt scriptorum carpere cartas, Ut caper hirsutus rodet cum dente racemos; Nec tamen emendant titubantis gramma poetae. DOMINO SANCTO SAPIENTISSIMO IN CHRISTO QVIDEM CARISSIMO ALDHELMO SCOTTVS IGNOTI NOMINIS IN DEO AETERNO SALVTEM. Dum te praestantem ingenio facundiaque Romana ac vario flore litterarum, etiam Graecorum more non nesciam, ex ore tuo, fonte videlicet scientiae purissimo, discere malo quam ex aliquo quolibet potare turbulento magistro.","prev":{"citation":"Ald. epp. 64-70","label":"64 to 70","url":"https://interlinea.aeterna-institute.org/library/latin/aldhelm/ald-epp/64","api":"https://interlinea.aeterna-institute.org/api/v1/library/latin/aldhelm/ald-epp/64"},"next":{"citation":"Ald. epp. 79-87","label":"79 to 87","url":"https://interlinea.aeterna-institute.org/library/latin/aldhelm/ald-epp/79","api":"https://interlinea.aeterna-institute.org/api/v1/library/latin/aldhelm/ald-epp/79"},"credit":{"text":"Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}