{"kind":"section","lang":"la","language":"Latin","title":"Ald. epp. 9-17","citation":"Aldhelm, Ald. epp. 9-17","ref":"9","level":null,"urn":null,"url":"https://interlinea.aeterna-institute.org/library/latin/aldhelm/ald-epp/9","api":"https://interlinea.aeterna-institute.org/api/v1/library/latin/aldhelm/ald-epp/9","markdown":"https://interlinea.aeterna-institute.org/library/latin/aldhelm/ald-epp/9.md","author":{"name":"Aldhelm","url":"https://interlinea.aeterna-institute.org/library/latin/aldhelm"},"work":{"title":"Ald. epp.","url":"https://interlinea.aeterna-institute.org/library/latin/aldhelm/ald-epp","urn":null},"verse":false,"words":330,"text":"Haec idcirco, carissime pater, cursim pedetemptim perstrinximus, non garrulo verbositatis strepitu illecti, sed ut scias, tanta rerum arcana examusim non posse intellegi, nisi frequens et prolixa meditatio fuerit adhibita. Salutate in Christo omnem sodalium meorum catervam a minimo usque ad maximum, quos obsecro et adiuro per clementiam Christi, ut pro me peccatorum pondere et criminum sarcina oppresso preces Domino fundant! REVERENTISSIMO PATRI MEAEQVE RUDIS INFANTIAE VENERANDO PRAECEPTORI HADRIANO ALDHELMVS BERNACVLVS FAMILIAE CHRISTI ET VESTRAE PIETATIS SVPPLEX ALVMNVS SALVTEM. Fateor, mi carissime, quem gratia purae dilectionis amplector, postquam a sodali contubernio vestro ante triennium circiter discedens a Cantia sequestrabar, quod nostra parvitas hactenus ad consortium vestrum ardenti desiderio flagrabat, quod etiam iamdudum cogitarem, quemadmodum in votis est, adimplens perficere, si rerum ratio ac temporum vicissitudo pateretur, et nisi me diversa impedimentorum obstacula retardarent presertimque corporeae fragilitatis valitudine medullitus tabentia membra coquente non sinerer, qua quondam, dum post prima elementa iterum apud vos essem, domum redire coactus sum.... DOMINO VENERABILITER DILIGENDO ET DELECTABILITER VENERANDO WIHTFRIDO ALDHELMVS BERNACVLVS SVPPLEX IN CHRISTO PERENNEM SALVTEM. Perlatum est mihi rumigerulis referentibus de vestrae caritatis industria, quod transmarinum iter gubernante Domino carpere sagacitate legendi succensa decreverit. Et idcirco vita comite optatum Hiberniae portum tenens sacrosancta potissimum praesagmina refutatis philosophorum commenticiis legito! Absurdum enim arbitror, spreta rudis ac veteris instrumenti inextricabili norma per lubrica dumosi ruris diverticula, immo per discolos philosophorum anfractus iter carpere seu certe aporriatis vitreorum fontium limpidis laticibus palustres pontias lutulentasque limphas siticulose potare, in quis atra bufonum turma catervatim scatet atque garrulitas ranarum crepitans coaxat. Quidnam, rogitans quaeso, orthodoxae fidei sacramento commodi affert circa temeratum spurcae Proserpinae incestum – quod abhorret fari – enucleate legendo scrutandoque sudescere aut Hermionam, petulantem Menelai et Helenae sobolem, quae, ut prisca produnt opuscula, despondebatur pridem iure dotis Oresti demumque sententia immutata Neoptolemo nupsit, lectionis praeconio venerari aut Lupercorum bacchantum antistites ritu litantium Priapo parasitorum heroico stilo historiae caraxare quae altato quondam sceptri in vertice celydro Ebreae contionis obtutibus praesentato, hoc est | alma mortis morte stipite pabuli affixa solotenus diruta evanuere?","prev":{"citation":"Ald. epp. 1-8","label":"1 to 8","url":"https://interlinea.aeterna-institute.org/library/latin/aldhelm/ald-epp/1","api":"https://interlinea.aeterna-institute.org/api/v1/library/latin/aldhelm/ald-epp/1"},"next":{"citation":"Ald. epp. 18-22","label":"18 to 22","url":"https://interlinea.aeterna-institute.org/library/latin/aldhelm/ald-epp/18","api":"https://interlinea.aeterna-institute.org/api/v1/library/latin/aldhelm/ald-epp/18"},"credit":{"text":"Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000827.zip","quality":"proofread"}}