{"kind":"section","lang":"la","language":"Latin","title":"SANCTUS AMBROSIUS MEDIOLANENSIS EPISCOPUS (c. 340-397) 0.1.30-35","citation":"Ambrosius, SANCTUS AMBROSIUS MEDIOLANENSIS EPISCOPUS (c. 340-397) 0.1.30-35","ref":"0.1.30","level":null,"urn":null,"url":"https://interlinea.aeterna-institute.org/library/latin/ambrosius/sanctus-ambrosius-mediolanensis-episcopus-c-340-397/0.1.30","api":"https://interlinea.aeterna-institute.org/api/v1/library/latin/ambrosius/sanctus-ambrosius-mediolanensis-episcopus-c-340-397/0.1.30","markdown":"https://interlinea.aeterna-institute.org/library/latin/ambrosius/sanctus-ambrosius-mediolanensis-episcopus-c-340-397/0.1.30.md","author":{"name":"Ambrosius","url":"https://interlinea.aeterna-institute.org/library/latin/ambrosius"},"work":{"title":"SANCTUS AMBROSIUS MEDIOLANENSIS EPISCOPUS (c. 340-397)","url":"https://interlinea.aeterna-institute.org/library/latin/ambrosius/sanctus-ambrosius-mediolanensis-episcopus-c-340-397","urn":null},"verse":false,"words":305,"text":"[30] habemus tyrannidem nostram. tyrannis sacerdotis infirmitas est: \"cum infirmor\", inquit, \"tunc potens sum.\" caveret tamen, ne ipse sibi tyrannum faceret, cui Deus adversarium non excitavit. non hoc Maximum dicere, quod tyrannus ego sim Valentiniani, qui se meae legationis obiectu queritur ad Italiam non potuisse transire. addidi, quia numquam sacerdotes tyranni fuerunt, sed tyrannos saepe sunt passi. [31] exactus est totus ille dies in maerore nostro; scissae tamen ab illudendibus pueris cortinae regiae. ego domum redire non potui, quia circumfusi erant milites, qui basilicam custodiebant. cum fratribus psalmos in ecclesiae basilica minore diximus. [32] sequenti die lectus est de more liber Ionae, quo completo hunc sermonem exorsus sum: \"liber lectus est, fratres, quo prophetatur, quod peccatores in paenitentiam revertantur. acceptum est ita, ut speraretur in praesenti futurum.\" addidi, quod vir iustus etiam offensam contrahere voluisset, ne vel spectaret vel denuntiaret excidium civitati, et quod contristatus quoque sit, quod aruisset cucurbita. [33] Deum quoque dixisse ad prophetam: \"tristis es pro cucurbita?\" respondisse Ionam: \"tristis.\" dixisse dominum, si illud doleret, quod exusta esset cucurbita, quanto magis sibi curae esse oportere tantae plebis salutem! et ideo excidium, quod paratum toti urbi fuerat, removisse. [34] nec mora, nuntiatur imperatorem iussisse, ut recederent milites de basilica, negotiatoribus quoque, quod exacti de condemnatione fuerant, redderetur. quae tunc plebis totius laetitia fuit! qui totius populi plausus, quae gratiae! erat autem dies, quo sese dominus pro nobis tradidit, quo in ecclesia paenitentia relaxatur. certatim hoc nuntiare milites, irruentes in altaria osculis significare pacis insigne. tunc agnovi, quod Deus vermem antelucanum percusserat, ut tota civitas servaretur. [35] haec gesta sunt atque utinam iam finita! sed graviores motus futuros plena commotionis imperialia verba indicant. ego tyrannus appellor, et plus etiam quam tyrannus. nam cum imperatorem comites obsecrarent, uti prodiret ad ecclesiam, idque petitu militum facere se dicerent, respondit: \"si vobis iusserit Ambrosius, vinctum.me tradetis.\" quid post hanc vocem supersit, considera.","prev":{"citation":"SANCTUS AMBROSIUS MEDIOLANENSIS EPISCOPUS (c. 340-397) 0.1.24-29","label":"0.1.24 to 0.1.29","url":"https://interlinea.aeterna-institute.org/library/latin/ambrosius/sanctus-ambrosius-mediolanensis-episcopus-c-340-397/0.1.24","api":"https://interlinea.aeterna-institute.org/api/v1/library/latin/ambrosius/sanctus-ambrosius-mediolanensis-episcopus-c-340-397/0.1.24"},"next":{"citation":"SANCTUS AMBROSIUS MEDIOLANENSIS EPISCOPUS (c. 340-397) 0.1.36","label":"Epistula ad Sororem","url":"https://interlinea.aeterna-institute.org/library/latin/ambrosius/sanctus-ambrosius-mediolanensis-episcopus-c-340-397/0.1.36","api":"https://interlinea.aeterna-institute.org/api/v1/library/latin/ambrosius/sanctus-ambrosius-mediolanensis-episcopus-c-340-397/0.1.36"},"credit":{"text":"Ambrosius, SANCTUS AMBROSIUS MEDIOLANENSIS EPISCOPUS (c. 340-397). Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/ambrose.html","quality":"proofread"}}