{"kind":"section","lang":"la","language":"Latin","title":"Carmina 1","citation":"Antun Rozanović, Carmina 1","ref":"1","level":null,"urn":null,"url":"https://interlinea.aeterna-institute.org/library/latin/antun-rozanovic/carmina/1","api":"https://interlinea.aeterna-institute.org/api/v1/library/latin/antun-rozanovic/carmina/1","markdown":"https://interlinea.aeterna-institute.org/library/latin/antun-rozanovic/carmina/1.md","author":{"name":"Antun Rozanović","url":"https://interlinea.aeterna-institute.org/library/latin/antun-rozanovic"},"work":{"title":"Carmina","url":"https://interlinea.aeterna-institute.org/library/latin/antun-rozanovic/carmina","urn":null},"verse":true,"words":139,"text":"Nicoleos uates uati sua munera Petro\ntransmisit baculum, quo leve carpat iter.\nIs baculus teres est, Memphitica prorsus arundo,\ncui ebur in capulo, cuspide cornus inest.\nArgumenta, puto, lateant sub munere que sic\nplerumque in fictis uera poeta canat.\nFictus eburna gerit successus, cornea uerus\nSigna, sed et uocem concaua canna notat.\nAut forsam uitam, sapiens sic indicat autor,\ndebere a falsis ad bona uera trahi?\nut, quamuis totos per inania duxerit annos,\ninnixus ueri cuspide sistat homo.\nUel potius scipione bonam signare senectam\ndonator cupiens munere fecit idem?\nGlabra caput senii referunt, sed et arrida corpus,\nduratos cornu significante pedes.\nSeu forte aetatem noscens levi egere bacillo\nsphingiaci monuit tempus adesse pedis.\nEt decus Illiriae per commoda quaeque fouendo\nhac onerosa leui tempora fulsit ope.\nQuiquid id est, non mittere munus amicus amico\nlongeuo senior gratius hoc potuit.","prev":null,"next":null,"credit":{"text":"Antun Rozanović, Carmina. Text: Croatiae Auctores Latini, CC BY 4.0. Changes: markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://github.com/nevenjovanovic/croatiae-auctores-latini-textus/blob/729f0ee28de9d35c94009e877e500fae5e971299/txts/rozan-a-epigr-nalis-1572.xml","quality":"ocr"}}