{"kind":"section","lang":"la","language":"Latin","title":"Sarcoptes 1.36-50","citation":"Apicius, Sarcoptes 1.36-50","ref":"1.36","level":null,"urn":null,"url":"https://interlinea.aeterna-institute.org/library/latin/apicius/sarcoptes/1.36","api":"https://interlinea.aeterna-institute.org/api/v1/library/latin/apicius/sarcoptes/1.36","markdown":"https://interlinea.aeterna-institute.org/library/latin/apicius/sarcoptes/1.36.md","author":{"name":"Apicius","url":"https://interlinea.aeterna-institute.org/library/latin/apicius"},"work":{"title":"Sarcoptes","url":"https://interlinea.aeterna-institute.org/library/latin/apicius/sarcoptes","urn":null},"verse":false,"words":284,"text":"10. APOTHERMUM SIC FACIES. Alicam elixa cum nucleis et amigdalis depilatis et in aqua infusis et lotis ex creta argentaria ut ad candorem pariter perducantur. Cui ammiscebis uvam passam, carenum vel passum. Desuper piper confractum asparges et in boletari inferes. III. Vulvulae, botelli. 1. VULVULAE ISICIATAE SIC FIUNT. Piper tritum et cuminum, capita porrorum brevia duo ad molle purgata, rutam, liquamen; admiscentur pulpae bene tunsae et fricaltae denuo cum ipso subtrito ita ut commisceri possit, mittas piperis grana et nucleos, et calcabis in materia bene lota. Et sic conquuntur ex aqua, oleo, liquamine, fasciculo porrorum et aneto. 2. BOTELLUM SIC FACIES. Sex ovi vitellis coctis, nucleis pineis concisis caepam, porrum concisum, ius crudum misces, piper minutum, et sic intestinum farcies. Adicies liquamen et vinum, et sic coques. IV. Lucanicae. Lucanicas similiter ut supra scriptum est: Lucanicarum confectio teritur piper, cuminum, satureia, ruta, petroselinum, condimentum, bacae lauri, liquamen, et admiscetur pulpa bene tunsa ita ut denuo bene cum ipso subtrito fricetur. Cum liquamine admixto, pipere integro et abundanti pinguedine et nucleis inicies in intestinum perquam tenuatim perductum, et sic ad fumum suspenditur. V. Farcimina. 1. Ova et cerebella teres, nucleos pineos, piper, liquamen, laser modicum, et his intestinum implebis. Elixas, postea assas et inferes. 2. ALITER. Coctam alicam et tritam cum pulpa concisa et trita una cum piper et liquamine et nucleis. Farcies intestinum et elixabis, deide cum sale assabis et cum senapi inferes, vel sic concisum in disco. 3. ALITER. Alicam purgas et cum liquamine intestini et albamine porri concisi minutatim simul elixas. Elixato tolles, pinguedinem concides et copadia pulpae, in se omnia commisces. Teres piper, ligusticum, ova tria, haec omnia in mortario permiscer cum nucleis et piper integro. Liquamen suffundes, intestina imples, elixas et subassas, vel elixa tamtum appones.","prev":{"citation":"Sarcoptes 1.19-35","label":"1.19 to 1.35","url":"https://interlinea.aeterna-institute.org/library/latin/apicius/sarcoptes/1.19","api":"https://interlinea.aeterna-institute.org/api/v1/library/latin/apicius/sarcoptes/1.19"},"next":{"citation":"Sarcoptes 1.51-53","label":"1.51 to 1.53","url":"https://interlinea.aeterna-institute.org/library/latin/apicius/sarcoptes/1.51","api":"https://interlinea.aeterna-institute.org/api/v1/library/latin/apicius/sarcoptes/1.51"},"credit":{"text":"Apicius, Sarcoptes. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/apicius/apicius2.shtml","quality":"proofread"}}