{"kind":"section","lang":"la","language":"Latin","title":"Ciris 150-194","citation":"Appendix Vergiliana, Ciris 150-194","ref":"150","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/150","api":"https://interlinea.aeterna-institute.org/api/v1/library/latin/appendix-vergiliana/ciris/150","markdown":"https://interlinea.aeterna-institute.org/library/latin/appendix-vergiliana/ciris/150.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":289,"text":"Procurrit uirgo. quod uti ne prodita ludo\nAureolam gracili soluisses corpore pallam.\nOmnia quae retinere gradum cursusque morari\nPossent, o tecum uellem tu semper haberes:\nNon, numquam uiolata manu sacraria diuae\nIurando, infelix, nequiquam periurasses.\nEtsi quis nocuisse tibi periuria credat?\nCausa pia est: timuit fratri te ostendere Iuno.\nAt leuis ille deus, cui semper ad ulciscendum\nQuaeritur ex omni uerborum iniuria dictu,\nAurea fulgenti depromens tela pharetra\n(Heu nimium terrent, nimium Tirynthia uisu)\nVirginis in tenera defixerat omnia mente.\nQuae simul ac uenis hausit sitientibus ignem\nEt ualidum penitus concepit in ossa furorem,\nSaeua uelut gelidis Edonum Bistonis oris\nIctaue barbarico Cybeles antistita buxo,\nInfelix uirgo tota bacchatur in urbe,\nNon storace Idaeo fragrantis uincta capillos,\nCoccina non teneris pedibus Sicyonia seruans,\nNon niueo retinens bacata monilia collo.\nMultum illi incerto trepidant uestigia cursu:\nSaepe redit patrios ascendere perdita muros\nAeriasque facit causam se uisere turris;\nSaepe etiam tristis uoluens in nocte querelas\nSedibus ex altis *caeli* speculatur amorem\nCastraque prospectat crebris lucentia flammis.\nNulla colum nouit, carum non respicit aurum,\nNon arguta sonant tenui psalteria chorda,\nNon Libyco molles plauduntur pectine telae;\nNullus in ore rubor: ubi enim rubor, obstat amori.\nAtque ubi nulla malis reperit solacia tantis\nTabidulamque uidet labi per uiscera mortem,\nQuo uocat ire dolor, subigunt quo tendere fata,\nFertur et horribili praeceps impellitur oestro,\nVt patris, a demens, crinem de uertice *serum\nFurtim atque argute detonsum mitteret hosti\n(Namque haec condicio miserae proponitur una),\nSiue illa ignorans -quis non bonus omnia malit\nCredere, quam tanti sceleris damnare puellam?-\nHeu tamen infelix: quid enim imprudentia prodest?\nNise pater, cui direpta crudeliter urbe\nVix erit una super sedes in turribus altis,\nFessus ubi extructo possis considere nido,\n(Tu quoque auis moriere) dabit tibi filia poenas.","prev":{"citation":"Ciris 92-149","label":"Lines 92-149","url":"https://interlinea.aeterna-institute.org/library/latin/appendix-vergiliana/ciris/92","api":"https://interlinea.aeterna-institute.org/api/v1/library/latin/appendix-vergiliana/ciris/92"},"next":{"citation":"Ciris 195-240","label":"Lines 195-240","url":"https://interlinea.aeterna-institute.org/library/latin/appendix-vergiliana/ciris/195","api":"https://interlinea.aeterna-institute.org/api/v1/library/latin/appendix-vergiliana/ciris/195"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}