{"kind":"section","lang":"la","language":"Latin","title":"Ciris 283-323","citation":"Appendix Vergiliana, Ciris 283-323","ref":"283","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/283","api":"https://interlinea.aeterna-institute.org/api/v1/library/latin/appendix-vergiliana/ciris/283","markdown":"https://interlinea.aeterna-institute.org/library/latin/appendix-vergiliana/ciris/283.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":275,"text":"Vix haec ediderat, cum clade exterrita tristi\nIntonsos multo deturpat puluere crinis\nEt grauiter questu Carme complorat anili:\n'O mihi nunc iterum crudelis reddite Minos,\nO iterum nostrae Minos inimice senectae,\nSemper<ne> aut aut olim natae te propter eundem\nAut Amor insanae luctum portauit alumnae.\nTene ego tam longe capta atque auecta nequiui,\nTam graue seruitium, tam duros passa labores,\nEffugere, o bis iam exitium crudele meorum?\nIam iam nec nobis aequo senioribus ullum,\nViuere uti cupiam, uiuit genus. ut quid ego amens\nTe erepta, o Britomarti, mei spes una sepulcri,\nTe, Britomarti, diem potui producere uitae?\nAtque utinam celeri nec tantum grata Dianae\nVenatus esses uirgo sectata uirorum,\nGnosia nec Partho contendens spicula cornu\nDictaeas ageres ad gramina nota capellas.\nNumquam tam obnixe fugiens Minois amores\nPraeceps aerii specula de montis abisses,\nVnde alii fugisse ferunt et nomen Aphaeae\nVirginis assignant, alii, quo notior esses,\nDictynam dixere tuo de nomine Lunam.\nSint haec uera uelim: mihi certe, nata, peristi;\nNumquam ego te summo uolitantem uertice <Dictes>\nHyrcanos inter comites agmenque ferarum\nConspiciam nec te redeuntem amplexa tenebo.\nVerum haec tum nobis grauia atque indigna fuere,\nTum, mea alumna, tui cum spes integra maneret\nNec uox ista meas nondum uiolauerat auris.\nTene etiam fortuna mihi crudelis ademit,\nTene, o sola meae uiuendi causa senectae?\nSaepe tuo dulci nequiquam capta sopore\nCum premeret natura, mori me uelle negaui,\nVt tibi Corycio glomerarem flammea luto.\nQuo nunc me, infelix, aut quae me fata reseruant?\nAn nescis, qua lege patris de uertice summo\nEdita candentis praetexat purpura canos,\nQuae tenuis patrio spes sit suspensa capillo?\nSi nescis, aliquam possum sperare salutem,\nInscia quandoquidem scelus es conata nefandum;","prev":{"citation":"Ciris 241-282","label":"Lines 241-282","url":"https://interlinea.aeterna-institute.org/library/latin/appendix-vergiliana/ciris/241","api":"https://interlinea.aeterna-institute.org/api/v1/library/latin/appendix-vergiliana/ciris/241"},"next":{"citation":"Ciris 324-368","label":"Lines 324-368","url":"https://interlinea.aeterna-institute.org/library/latin/appendix-vergiliana/ciris/324","api":"https://interlinea.aeterna-institute.org/api/v1/library/latin/appendix-vergiliana/ciris/324"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}