{"kind":"section","lang":"la","language":"Latin","title":"Ciris 369-415","citation":"Appendix Vergiliana, Ciris 369-415","ref":"369","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/369","api":"https://interlinea.aeterna-institute.org/api/v1/library/latin/appendix-vergiliana/ciris/369","markdown":"https://interlinea.aeterna-institute.org/library/latin/appendix-vergiliana/ciris/369.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":309,"text":"At nutrix patula componens sulpura testa\nNarcissum casiamque herbas incendit olentis\nTerque nouena ligans triplici diuersa colore\nFila 'ter in gremium mecum' inquit 'despue, uirgo,\nDespue ter, uirgo: numero deus impare gaudet'.\nInde mago geminata Ioui fert sedula sacra,\nSacra nec Idaeis anubus nec cognita Grais;\nPergit Amyclaeo spargens altaria thallo\nRegis Iolciacis animum defigere uotis.\nVerum ubi nulla mouet stabilem fallacia Nisum,\nNec possunt homines nec possunt flectere diui\n(Tanta est in paruo fiducia crine cauendi),\nRursus ad inceptum sociam se adiungit alumnae\nPurpureumque parat rursus tondere capillum\nTam longo quod iam captat succurrere amori,\nNon minus illa tamen reuehi quod moenia Cressa\nGaudeat: et cineri patria est iucunda sepulto.\nErgo iterum capiti Scylla est inimica paterno:\nTum coma Sidonio florens deciditur ostro,\nTum capitur Megara et diuum responsa probantur,\nTum suspensa nouo ritu de nauibus altis\nPer mare caeruleum trahitur Niseia uirgo.\nComplures illam nymphae mirantur in undis,\nMiratur pater Oceanus et candida Tethys\nEt cupidas secum rapiens Galatea sorores;\nIlla etiam iunctis magnum quae piscibus aequor\nEt glauco bipedum curru metitur equorum\nLeucothea, paruusque dea cum matre Palaemon;\nIlli etiam alternas sortiti uiuere luces,\nCara Iouis suboles, magnum Iouis incrementum,\nTyndaridae niueos mirantur uirginis artus.\nHas adeo uoces atque haec lamenta per auras\nFluctibus in mediis questu uoluebat inani,\nAd caelum infelix ardentia lumina tendens,\nLumina, nam teneras arcebant uincula palmas:\n'Supprimite o paulum turbati flamina uenti,\nDum queror et diuos (quamquam nil testibus illis\nProfeci) extrema moriens tamen alloquor hora.\nVos ego, uos adeo, uenti, testabor et aurae,\nVos, *o numantina* si qui de gente uenitis,\nCernitis: illa ego sum cognato sanguine uobis\nScylla (quod o salua liceat te dicere Procne),\nIlla ego sum Nisi pollentis filia quondam,\nCertatim ex omni petiit quam Graecia regno,\nQua curuus terras amplectitur Hellespontus:\nIlla ego sum, Minos, sacrato foedere coniunx\nDicta tibi: tamen haec, etsi non accipis, audis.","prev":{"citation":"Ciris 324-368","label":"Lines 324-368","url":"https://interlinea.aeterna-institute.org/library/latin/appendix-vergiliana/ciris/324","api":"https://interlinea.aeterna-institute.org/api/v1/library/latin/appendix-vergiliana/ciris/324"},"next":{"citation":"Ciris 416-458","label":"Lines 416-458","url":"https://interlinea.aeterna-institute.org/library/latin/appendix-vergiliana/ciris/416","api":"https://interlinea.aeterna-institute.org/api/v1/library/latin/appendix-vergiliana/ciris/416"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}