{"kind":"section","lang":"la","language":"Latin","title":"Ciris 416-458","citation":"Appendix Vergiliana, Ciris 416-458","ref":"416","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/416","api":"https://interlinea.aeterna-institute.org/api/v1/library/latin/appendix-vergiliana/ciris/416","markdown":"https://interlinea.aeterna-institute.org/library/latin/appendix-vergiliana/ciris/416.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":278,"text":"Vinctane tam magni tranabo gurgitis undas?\nVincta tot assiduas pendebo ex ordine luces?\nNon equidem me alio possum contendere dignam\nSupplicio, quae sic patriam carosque penates\nHostibus immitique addixi ignara tyranno.\nVerum istaec, Minos, illos scelerata putaui,\nSi nostra ante aliqui nudasset foedera casus,\nFacturos, quorum direptis moenibus urbis,\nO ego crudelis flamma delubra petiui:\nTe uero uictore prius uel sidera cursus\nMutatura suos quam te mihi talia captae\nFacturum metui: iam iam scelus omnia uicit.\nTene ego plus patrio dilexi perdita regno?\nTene ego? nec mirum: uultu decepta puella\nVt uidi, ut perii, ut me malus abstulit error.\nNon equidem ex isto speraui corpore posse\nTale malum nasci: forma uel sidera fallat!\nMe non deliciis commouit regia diues,\n<Diues> curalio fragili et lacrimoso electro,\nMe non florentes aequali corpore nymphae,\nNon metus incedens potuit retinere deorum:\nOmnia uicit amor: quid enim non uinceret ille?\nNon mihi iam pingui sudabunt tempora murra,\nPronuba nec castos accendet pinus odores,\nNon Libys Assyrio sternetur lectulus ostro -\nMagna queror: ne me illa quidem communis alumna\nOmnibus iniecta Tellus tumulabit harena.\nMene inter matres ancillarique maritas,\nMene alias inter famularum munere fungi,\nConiugis atque tuae, quaecumque erit illa, beatae\nNon licuit grauidos penso deuoluere fusos?\nAt belli saltem captiuam lege necasses.\nIam fessae tandem fugiunt de corpore uires\nEt caput inflexa lentum ceruice recumbit,\nMarmorea adductis liuescunt bracchia nodis.\nAequoreae pristes, immania corpora ponti,\nVndique conueniunt et glauco in gurgite circum\nVerbere caudarum atque oris minitantur hiatu.\nIam tandem casus hominum, iam respice, Minos.\nSit satis hoc, tantum solam uidisse malorum:\nVel fato fuerit nobis haec debita pestis,\nVel casu incerto, merita uel denique culpa:\nOmnia nam potius quam te fecisse putabo'.","prev":{"citation":"Ciris 369-415","label":"Lines 369-415","url":"https://interlinea.aeterna-institute.org/library/latin/appendix-vergiliana/ciris/369","api":"https://interlinea.aeterna-institute.org/api/v1/library/latin/appendix-vergiliana/ciris/369"},"next":{"citation":"Ciris 459-507","label":"Lines 459-507","url":"https://interlinea.aeterna-institute.org/library/latin/appendix-vergiliana/ciris/459","api":"https://interlinea.aeterna-institute.org/api/v1/library/latin/appendix-vergiliana/ciris/459"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}