{"kind":"section","lang":"la","language":"Latin","title":"Ciris 459-507","citation":"Appendix Vergiliana, Ciris 459-507","ref":"459","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/459","api":"https://interlinea.aeterna-institute.org/api/v1/library/latin/appendix-vergiliana/ciris/459","markdown":"https://interlinea.aeterna-institute.org/library/latin/appendix-vergiliana/ciris/459.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":290,"text":"Labitur interea resoluta ab litore classis,\nMagna repentino sinuantur lintea coro,\nFlectitur in uiridi remus sale, languida fessae\nVirginis in cursu moritur querimonia longo.\nDeserit angustis inclusum faucibus Isthmon,\nCypselidae et magni florentia regna, Corinthum;\nPraeterit abruptas Scironis protinus arces\nInfestumque suis dirae testudinis exit\nSpelaeum multoque cruentas hospite cautes.\nIamque adeo tutum longe Piraeea cernit\nEt notas, eheu frustra, respectat Athenas.\nIam procul e fluctu Salaminia respicit arua\nFlorentisque uidet iam Cycladas: hinc *uenus* illi\nSunius, hinc statio contra patet Hermionea.\nLinquitur ante alias longe gratissima Delos\nNereidum matri et Neptuno Aegaeo;\nProspicit incinctam spumanti litore Cythnum\nMarmoreamque Paron uiridemque allapsa Donysam\n*Aeginamque simul* salutiferamque Seriphum.\nFertur et incertis iactatur ad omnia uentis,\nCumba uelut, magnas sequitur cum paruula classis\nAfer et hiberno bacchatur in aequore turbo,\nDonec tale decus formae uexarier undis\nNon tulit ac miseros mutauit uirginis artus\nCaeruleo pollens coniunx Neptunia regno.\nSed tamen aeternam squamis uestire puellam\nInfidosque inter teneram committere pisces\nNon statuit (nimium est auidum pecus Amphitrites):\nAeriis potius sublimem sustulit alis,\nEsset ut in terris facti de nomine ciris,\nCiris Amyclaeo formosior ansere Ledae.\nHic uelut in niueo tenerae cum primitus ouo\nEffigies animantur et internodia membris\nImperfecta nouo fluitant concreta calore,\nSic liquido Scyllae circumfusum aequore corpus\nSemiferi incertis etiam nunc partibus artus\nVndique mutabant atque undique mutabantur.\nOris honos primum et multis optata labella\nEt patulae frontis species concrescere in unum\nCoepere et gracili mentum producere rostro.\nTum, qua se medium capitis discrimen agebat,\nEcce repente uelut patrios imitatus honores\nPuniceam concussit apex in uertice cristam;\nAt mollis uarios intexens pluma colores\nMarmoreum uolucri uestiuit tegmine corpus\nLentaque perpetuas fuderunt bracchia pennas;\nInde alias partes minioque infecta rubenti\nCrura noua macies obduxit squalida pelle\nEt pedibus teneris unguis affixit acutos.","prev":{"citation":"Ciris 416-458","label":"Lines 416-458","url":"https://interlinea.aeterna-institute.org/library/latin/appendix-vergiliana/ciris/416","api":"https://interlinea.aeterna-institute.org/api/v1/library/latin/appendix-vergiliana/ciris/416"},"next":{"citation":"Ciris 508-541","label":"Lines 508-541","url":"https://interlinea.aeterna-institute.org/library/latin/appendix-vergiliana/ciris/508","api":"https://interlinea.aeterna-institute.org/api/v1/library/latin/appendix-vergiliana/ciris/508"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}