{"kind":"section","lang":"la","language":"Latin","title":"Ciris 48-91","citation":"Appendix Vergiliana, Ciris 48-91","ref":"48","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/48","api":"https://interlinea.aeterna-institute.org/api/v1/library/latin/appendix-vergiliana/ciris/48","markdown":"https://interlinea.aeterna-institute.org/library/latin/appendix-vergiliana/ciris/48.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":276,"text":"Impia prodigiis ut quondam exterrita *amplis\nScylla nouos auium sublimis in aere coetus\nViderit et tenui conscendens aethera penna\nCaeruleis sua tecta super uolitauerit alis,\nHanc pro purpureo poenam scelerata capillo,\nPro patria soluens excisa et funditus urbe.\nComplures illam magni, Messala, poetae\n(Nam uerum fateamur: amat Polyhymnia uerum)\nLonge alia perhibent mutatam membra figura\nScyllaeum monstro saxum infestasse uoraci;\nIllam esse aerumnis quam saepe legamus Vlixi\nCandida succinctam latrantibus inguina monstris\nDulichias uexasse rates et gurgite in alto\nDeprensos nautas canibus lacerasse marinis.\nSed neque Maeoniae patiuntur credere chartae\nNec malus istorum dubiis erroribus auctor.\nNamque alias alii uulgo finxere puellas\nQuae Colophoniaco Scyllae dicantur Homero.\nIpse Crataein ei matrem; sed siue Crataeis,\nSiue illam monstro *genuit grauena* biformi,\nSiue est neutra parens atque hoc in carmine toto\nInguinis est uitium et veneris descripta libido;\nSiue etiam iactis speciem mutata uenenis\nInfelix uirgo (quid enim commiserat illa?\nIpse pater timidam saeua complexus harena\nConiugium castae uiolauerat Amphitrites;\nAst tamen exegit longo post tempore poenas,\nVt, cum cura sui ueheretur coniugis alto,\nIpsa trucem multo misceret sanguine pontum):\nSeu uero, ut perhibent, forma cum uinceret omnis\nEt cupidos quaestu passim popularet amantes,\nPiscibus et canibusque malis uallata repente est:\nHorribilis circum uidit se existere formas\n(Heu quotiens mirata nouos expalluit artus\nIpsa suos, quotiens heu pertimuit latratus),\nAusa quod est mulier numen fraudare deorum\nEt dictam Veneri uotorum auertere poenam.\nQuam mala multiplici iuuenum quod saepta caterua\nVixerat atque animo meretrix iactata ferarum,\nInfamem tali meritorum more fuisse,\nDocta Palaepaphiae testatur uoce Pachynus:\nQuidquid et ut quisque est tali de clade locutus,\n*Omnia sim*: potius liceat notescere cirin\nAtque unam ex multis Scyllam non esse puellis.","prev":{"citation":"Ciris 1-47","label":"Lines 1-47","url":"https://interlinea.aeterna-institute.org/library/latin/appendix-vergiliana/ciris/1","api":"https://interlinea.aeterna-institute.org/api/v1/library/latin/appendix-vergiliana/ciris/1"},"next":{"citation":"Ciris 92-149","label":"Lines 92-149","url":"https://interlinea.aeterna-institute.org/library/latin/appendix-vergiliana/ciris/92","api":"https://interlinea.aeterna-institute.org/api/v1/library/latin/appendix-vergiliana/ciris/92"},"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}