{"kind":"section","lang":"la","language":"Latin","title":"Ciris 508-541","citation":"Appendix Vergiliana, Ciris 508-541","ref":"508","level":null,"urn":null,"url":"https://interlinea.aeterna-institute.org/library/latin/appendix-vergiliana/ciris/508","api":"https://interlinea.aeterna-institute.org/api/v1/library/latin/appendix-vergiliana/ciris/508","markdown":"https://interlinea.aeterna-institute.org/library/latin/appendix-vergiliana/ciris/508.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Ciris","url":"https://interlinea.aeterna-institute.org/library/latin/appendix-vergiliana/ciris","urn":"urn:cts:latinLit:phi0692.phi007"},"verse":true,"words":221,"text":"Et tamen hoc demum miserae succurrere pacto\nVix fuerat placida Neptuni coniuge dignum.\nNumquam illam post haec oculi uidere suorum\nPurpureas flauo retinentem uertice uittas,\nNon thalamus Syrio fragrans accepit amomo,\nNullae illam sedes; quid enim iam sedibus illi?\nQuae simul ut sese cano de gurgite uelox\nCum sonitu ad caelum stridentibus extulit alis\nEt multum late dispersit in aequora rorem,\nInfelix uirgo nequiquam <a> morte recepta\nIncultum solis in rupibus exigit aeuum,\nRupibus et scopulis et litoribus desertis.\nNec tamen hoc ipsum poena sine: namque deum rex\nOmnia qui imperio terrarum milia uersat,\nCommotus talem ad superos uolitare puellam,\nCum pater exstinctus caeca sub nocte lateret,\nIlli pro pietate sua (nam saepe nitentum\nSanguine taurorum supplex resperserat aras,\nSaepe deum largo decorarat munere sedes)\nReddidit optatam mutato corpore uitam\nFecitque in terris haliaeetos ales ut esset,\nQuippe aquilis semper gaudet deus ille coruscis.\nHuic uero miserae, quoniam damnata deorum\nIudicio natique et coniugis ante fuisset,\nInfesti apposuit odium crudele parentis;\nNamque ut in aetherio signorum munere praestans,\nVnum quem duplici stellatum sidere uidi,\nScorpios alternis clarum fugat Oriona,\nSic inter sese tristis haliaeetos iras\nEt ciris memori seruant ad saecula fato:\nQuacumque illa leuem fugiens secat aethera pennis,\nEcce inimicus atrox magno stridore per auras\nInsequitur Nisus: qua se fert Nisus ad auras\nIlla leuem fugiens raptim secat aethera pennis.","prev":{"citation":"Ciris 459-507","label":"Lines 459-507","url":"https://interlinea.aeterna-institute.org/library/latin/appendix-vergiliana/ciris/459","api":"https://interlinea.aeterna-institute.org/api/v1/library/latin/appendix-vergiliana/ciris/459"},"next":null,"credit":{"text":"Appendix Vergiliana, Ciris. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cciri%7C001","quality":"proofread"}}