{"kind":"section","lang":"la","language":"Latin","title":"Copa 1","citation":"Appendix Vergiliana, Copa 1","ref":"1","level":null,"urn":null,"url":"https://interlinea.aeterna-institute.org/library/latin/appendix-vergiliana/copa/1","api":"https://interlinea.aeterna-institute.org/api/v1/library/latin/appendix-vergiliana/copa/1","markdown":"https://interlinea.aeterna-institute.org/library/latin/appendix-vergiliana/copa/1.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Copa","url":"https://interlinea.aeterna-institute.org/library/latin/appendix-vergiliana/copa","urn":"urn:cts:latinLit:phi0692.phi005"},"verse":true,"words":238,"text":"Copa Surisca, caput Graeca redimita mitella,\nCrispum sub crotalo docta mouere latus,\nEbria fumosa saltat lasciua taberna,\nAd cubitum raucos excutiens calamos.\nQuid iuuat aestiuo defessum puluere abesse,\nQuam potius bibulo decubuisse toro?\nSunt topia et calybae, cyathi, rosa, tibia, chordae,\nEt triclia umbrosis frigida harundinibus.\nEn et, Maenalio quae garrit dulce sub antro,\nRustica pastoris fistula more sonat.\nEst et uappa, cado nuper defusa picato,\nEt strepitans rauco murmure riuus aquae.\nSunt etiam croceo uiolae de flore corollae\nSertaque purpurea lutea mixta rosa\nEt quae uirgineo libata Achelois ab amne\nLilia uimineis attulit in calathis.\nSunt et caseoli, quos iuncea fiscina siccat,\nSunt autumnali cerea pruna die\nCastaneaeque nuces et suaue rubentia mala,\nEst hic munda Ceres, est Amor, est Bromius;\nSunt et mora cruenta et lentis uua racemis,\nEt pendet iunco caeruleus cucumis.\nEst tuguri custos armatus falce saligna,\nSed non et uasto est inguine terribilis.\nHuc calybita ueni: lassus iam sudat asellus;\nParce illi: Vestae delicium est asinus.\nNunc cantu crebro rumpunt arbusta cicadae,\nNunc uaria in gelida sede lacerta latet:\nSi sapis, aestiuo recubans *nunc* prolue uitro,\nSeu uis crystalli ferre nouos calices.\nHic age pampinea fessus requiesce sub umbra\nEt grauidum roseo necte caput strophio,\nFormosum tenerae decerpens ora puellae.\nA pereat cui sunt prisca supercilia!\nQuid cineri ingrato seruas bene olentia serta?\nAnne coronato uis lapide ista tegi?\nPone merum et talos. pereat qui crastina curat:\nMors aurem uellens 'uiuite' ait, 'uenio'.","prev":null,"next":null,"credit":{"text":"Appendix Vergiliana, Copa. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccopa%7C001","quality":"proofread"}}